Qusarda əməliyyatlar...
Daxili Qoşunlara məxsus 13 hərbi maşın və 1 ədəd ZTR meşə
massivində axtarışlar aparır

Azərbaycanın şimal bəlgəsi əməlli-başlı əməliyyatlar yerinə çevirilib. Bir az əvvəl "Meşə qardaşları" adlanan qrupun üzvləri və rəhbərləri zərərsizləşdirilmişdi. Ancaq bununla əməliyyatlar yekunlaşmayıb.
ANSPRESS-in bölgə müxbiri dünən Daxili Qoşunlara məxsus 13 hərbi maşın və 1 ədəd ZTR-in Qusar rayonunun Avaran kəndinin girəcəyindəki meşə massivində axtarış apardığını müşahidə edib. Bu əməliyyatların əvvəlkilərin davamı olduğu bildirilir.
Məlumat üçün qeyd edək ki, Azərbaycanın şimal rayonlarında əməliyyat tədbirlərinə avqustun sonlarından başlanıb. Avqustun 29-da 2007-ci ildə Qusar rayonunda polis əməkdaşını qətlə yetirdiyinə görə axtarılan həmin rayonun sakini Telman Abdullayevin, həmçinin Rusiyanın Şimali Qafqaz regionunda, o cümlədən Dağıstan və Çeçenistan respublikalarında törədilmiş terror aktlarında təqsirləndirilərək axtarışa elan edilmiş Zaqatala rayon sakini İlqar Mollaçiyevin Qusar rayonu ərazisindəki meşə massivində gizlənmələri ilə əlaqədar polis əməkdaşlarının və Daxili Qoşun hərbi qulluqçularının iştirakı ilə xüsusi əməliyyat hazırlanıb həyata keçirilib. Meşə massivində daranma əməliyyatı aparan polis əməkdaşları və hərbi qulluqçular ilə cinayətkar qrup arasında silahlı toqquşma baş verib və bu zaman Daxili Qoşunların çavuşu Əli Yolçuyev həlak olub. Sentyabrın 6-da isə hüquq-mühafizə orqanları Qusar şəhərindəki Mirzə Vəliyev küçəsində xüsusi əməliyyat keçiriblər. Dini-ekstremist qruplaşmanın gizləndiyi evi mühasirəyə alan əməliyyatçılara atəş açılıb, terrorçular əl qumbarasından da istifadə ediblər. Bundan sonra əməliyyatçılar qruplaşmanı zərərsizləşdirmək üçün qəti hərəkətə keçiblər. Qısa müddət ərzində evdə gizlənən Qusar sakinləri Telman Abdullayev, Gürşad Əlixanov və Kamil Əsədullayev məhv ediliblər. Dəstənin başçısı İlqar Mollaçıyev isə Dağıstan hüquq mühafizə orqanlarının keçirdiyi əməliyyat tədbirləri nəticəsində öldürülüb.