Mətbuatda yaxın zamanlarda "Kütləvi informasiya vasitələri haqqında" qanuna əlavə və dəyişikliklər ediləcəyi barədə məlumatlar əksini tapıb. Qeyd olunur ki, əlavə və dəyişikliklər Milli Məclisin Dövlət quruculuğu və hüquq daimi komissiyasında və İnsan hüquqları daimi komissiyasında müzakirə olunaraq plenar iclasın müzakirəsinə və səsverməyə çıxarılması qərara alınıb.
   
   
   
   Qanunvericilik təklifində "KİV haqqında" qanunun 60-cı maddəsinə belə bir əlavə olunması təklif edildiyi bildirilir: "Əməliyyat-axtarış halları istisna olmaqla digər hallarda şəxsin onun xəbəri olmadan və etirazına baxmayaraq KİV nümayəndələri tərəfindən izlənilməsi, video və fotoçəkilişinin, səs yazısının aparılması qanunvericiliklə müəyyən edilmiş məsuliyyətə səbəb olur".
   
   Bu məlumatlardan narahat olan Media Hüququ İnstitutu (MHİ) bəyanatla çıxış edib. Təşkilat bildirib ki, "İnformasiya əldə etmək haqqında" qanunun tələblərini pozan Milli Məclis administrasiyası bu təklifləri parlamentin saytı vasitəsilə zamanında açıqlamayıb. "Özündə ifadə azadlığı üçün ciddi təhlükələri daşıyan bu qanunvericilik təklifinin qeyri-şəffaf şəraitdə, ictimai müzakirələr olmadan, tələm-tələsik qəbul olunması heç bir halda məqbul sayıla bilməz".
   
   MHİ belə dəyişikliyin qəbul edilməsinin jurnalistlərin məlumat toplamaq və yaymaq azadlığına ağır zərbə vuracağını düşünür. "Æurnalist fəaliyyəti təkcə onlara dövlət qurumlarının, rəsmilərinin, ayrı-ayrı şəxslərin könüllü verdikləri məlumatları yaymaqla məhdudlaşdırıla bilməz. Æurnalistin məlumat toplamaq hüququ sadəcə gözlə müşahidə etməklə də məhdudlaşdırıla bilməz. Araşdırma aparan jurnalist nəinki hər hansı şəxsi izləmək haqqına, eləcə də hər hansı məlumatları texniki vasitələrdən istifadə etməklə dinləmək və yazmaq haqqına sahib olmalıdır. Demokratik toplumda jurnalistin üzərinə düşən vəzifə, jurnalist fəaliyyətinin cəmiyyətə gətirdiyi fayda ayrı-ayrı dövlət qurumlarının yerinə yetirdikləri vəzifələrdən az önəmli sayıla bilməz". MHİ dəyişikliyin konstitusiyanın 47-ci və 50-ci maddələri ilə yanaşı, Avropa İnsan Haqları Konvensiyasının 10-cu maddəsinə zidd, ifadə azadlığına qeyri-adekvat müdaxilə olduğunu bildirir, parlamenti bu qanun layihələrinin ictimai müzakirələrdən keçirilməsi üçün imkanlar yaratmağa və ifadə azadlığına zərər vuran müddəaları təkliflər layihəsindən çıxarmağa çağırır.
   
   "Xalq Cəbhəsi" qəzetinin baş redaktoru Elçin Mirzəbəyli isə deyir ki, bu dəyişikliklər mətbuat tərəfindən göz önünə alınmışdı. -"Çünki bunlar bilavasitə keçirilən referendumdan irəli gələn dəyişikliklərdir. Orda insan hüquq və azadlıqlarının qorunması, şəxsiyyətin təhlükəsizliyinin təmin olunması ilə bağlı prinsiplər öz yerini almışdı. Həmin konstitusion normalardan irəli gələn dəyişikliklər təbii ki, digər analoji qanunvericilik qaydalarına da, normativ aktlara da təsirini göstərməlidir. Ona görə də əslində burda qeyri-adi heç bir hadisə yoxdur". E.Mirzəbəyliyə görə, qanuna belə bir dəyişiklik edilsə belə seçim imkanları yenə mətbuatın öz üzərinə qalır. "Təbii ki, hər hansı bir fərdin gizli olaraq izlənilməsi və yaxud onun görüntülərinin lentə alınması şantaj məqsədi ilə istifdə olunursa, yolverilməzdir. Lakin əgər mətbuat nümayəndəsi hər hansı cinayət faktı barədə dəqiq məlumat alıbsa və həmin faktı lentə alıbsa, o zaman burda onun üçün açıq-aşkar alibi var və həmin şəxsin cinayət məsuliyyətinə cəlb olunması nə qanunvericilik, nə də hüquqi məntiq tərəfində deyil. O baxımdan əgər biz insan hüquq və azadlıqlarından danışırıqsa, onların qorunmasından söhbət açırıqsa, təkcə jurnalistlərin deyil, sıravi vətəndaşların da hüquqlarının qorunmasına hörmətlə yanaşmalıyıq. Parlamentə əgər belə bir qanun layihəsi çıxarılacaqsa, mən burda təhlükəli hər hansı bir fakt görmürəm. Əgər doğrudan mətbuatın missiyası özünün gerçək funksiyasını yerinə yetirməkdən ibarətdirsə, ortada digər məqsədlər yoxdursa, mətbuat nümayəndələri bundan narahat olmalı deyil". Baş redaktor hesab edir ki, bu dəyişikliyin qəbul edilməsi nəticə etibarilə "Diffamasiya haqqında" qanunun qəbul olunmasına yol açacaq. "Çünki vətəndaşların hüquq və azadlıqlarının qorunması ilə bağlı normativ hüquqi aktlar qaydaya düşməlidir ki, nəticə etibarilə "Diffamasiya haqqında" qanun qəbul ediləndə ortalığa digər problemlər çıxmasın".
   
   E.Mirzəbəyli məsələnin yeni olmadığı üçün ictimai müzakirəsinə də ehtiyac duymur. "Bu, yeni qanun deyil, konstitusiyada artıq bu dəyişikliklər öz əksini tapıb. Referendum keçirilməmişdən öncə də, sonra da bu məsələlər kifayət qədər müzakirə olundu. Bu, konstitusion normadır və digər qanunvericilik aktları buna uyğunlaşdırılmalıdır. O baxımdan burda yeni heç nə yoxdur".
   
   "Ayna" və "Zerkalo" qəzetlərinin baş redaktoru Elçin Şıxlı da qanuna belə bir dəyişikliyin ediləcəyinin onun üçün gözlənilən olduğunu vurğuladı. "Əlbəttə, bu əlavəyə münasibətim mənfidir. Biz referendum zamanı konstitusiyaya dəyişiklikdə artıq bunu əsas qoymuşuq. Konstitusiyada biz hamımız "hə" dedik ki, icazə olmadan şəkil çəkmək olmaz. İndi qanunverici aktlara həmin dəyişikliyi salıblar. Yəni bunu gözləmək lazım idi. Mən bunu geriyə bir yox, bir neçə addım sayıram". E.Şıxlı da məsələ ilə bağlı ictimai müzakirə açmağı lazım bilmir. "Əgər Konstitusiyaya dəyişiklik edilməsəydi, ictimai müzakirənin yeri var idi. Amma referendumda dəyişikliyə insanlar "hə" deyib. İndi də bunu həzm etməlidirlər".
   
   

"Erməni lobbisi qondarma soyqırımın ABŞ Konqresi tərəfindən tanınması üçün bütün səylərini işə salıb".
   
   Bu sözləri YAP-ın saytına YAP İcra katibinin müavini, millət vəkili Mübariz Qurbanlı ABŞ Konqresinin Nümayəndələr Palatasının xarici əlaqələr komitəsi tərəfindən mart ayında uydurma erməni soyqırımı məsələsini səsverməyə çıxarmağı nəzərdə tutmasına münasibət bildirərkən deyib. M.Qurbanlı deyib ki, "erməni soyqırımı"nın tanınması haqqında qətnamə layihəsi 2007-ci ilin yanvarında Kaliforniyadan olan demokrat-konqresmen Adam Şif tərəfindən Nümayəndələr Palatasının xarici əlaqələr komitəsinə təqdim edilib: "Həmin dövrdə ermənipərəst konqresmenlər bu qətnaməni komitədən keçirməyə nail olsalar da, prezident tərəfindən veto qoyulması nəticəsində ABŞ Konqresində və Senatda bütövlükdə səsverməyə çıxarılmamışdı. ABŞ-da olan bədnam Erməni Milli Komitəsi bu istiqamətdə daha çox canfəşanlıq etməkdədir. Bütün bu hərəkətlərin başlıca məqsədi Türkiyəyə təzyiq etməklə, onu Ermənistanla sərhədləri açmağa sövq etməkdir. Lakin hadisələrin gedişi göstərir ki, uydurma soyqırım təzyiqi qarşısında Türkiyə geri çəkilməyəcək".
   
   

ABŞ-ın "Prescient Worldwide" telefon şirkətinin rəsmi internet ünvanının beynəlxalq tariflər bölməsində Dağlıq Qarabağ Ermənistan ərazisi kimi göstərilib.
   
   Xarici İşlər Nazirliyinin mətbuat xidmətindən APA-ya verilən məlumata görə, nazirliyinin müvafiq göstərişi əsasında Azərbaycanın ABŞ-dakı səfirliyi tərəfindən sözügedən şirkətin rəhbəri Riçard Minervinoya etiraz məktubu göndərilib, həmin kobud səhvin düzəldilməsi və gələcəkdə belə səhvlərə yol verilməməsi tələb edilib. Cavab məktubunda R. Minervino adıçəkilən şirkətin internet ünvanında məlumatın düzəldilməsi üçün müvafiq tədbirlər görüldüyünü və gələcəkdə belə səhvlərin təkrarlanmayacağını bildirib.

Türkiyə-İsrail münasibətlərindəki gərginlik Azərbaycanın İsraillə ikitərəfli əlaqələrinə təsir göstərə bilməz.
   
    Bunu Milli.Az xəbər portalına açıqlamasında Xarici İşlər Nazirliyi mətbuat xidmətinin rəhbəri Elxan Poluxov deyib. Onun sözlərinə görə, Azərbaycanın Türkiyə ilə dostluq, müttəfiqlik münasibətləri mövcuddur, İsraillə də sıx əlaqələri var: "Sabah İsrailin xarici işlər naziri Aviqdor Liberman Azərbaycana səfər edəcək. Bu səfərin reallaşması da ölkələrimiz arasında münasibətlərin göstəricisidir. Türkiyə ilə İsrail arasındakı münasibətlər isə bu ölkələrin müəyyənləşdirdiyi xarici siyasət kursu ilə bağlı məsələdir. Biz bu ölkələrin hər ikisi ilə münasibətlərdən milli maraqlarımız üçün maksimal dərəcədə bəhrələnməyə çalışırıq".
   
   

Ermənistan Dağlıq Qarabağ münaqişəsinin nizamlanmasına dair aparılan danışıqlarda yenidən fasilə yaratmağa çalışır. Qeyd edək ki, ATƏT-in Minsk Qrupu həmsədrləri tərəfindən hazırlanan və daha çox ermənilərin maraqlarını əks etdirən "Madrid təklifləri"nə edilən son dəyişikliklər rəsmi İrəvanı razı salmayıb. Azərbaycan tərəfinin tələbi ilə edilən dəyişikliklərin mahiyyəti bəlli olmasa da, Ermənistan rəsmiləri bu variantın problemin ədalətli həllinə uyğun olmadığını bəyan edirlər.
   
   
   
   Siyasi ekspertlər isə hesab edir ki, rəsmi İrəvanın "Madrid təklifləri"ndən imtinası danışıqlarda yenidən vaxtı uzatmağa xidmət edir. Bununla belə ekspertlər rəsmi İrəvanın imtinasının həm sənədə edilən dəyişikliklərlə bağlı olmasını da mümkün sayırlar. Politiloq Rasim Musabəyov isə hesab edir ki, indiki şəraitdə Ermənistanı narazı salan əsas məqam DQ-nin statusu ilə bağlı referendum keçirilməsi məsələsinin "Madrid təkliflərin"dən çıxarılması və ya onun müəmmalı şəkildə göstərilməsi ola bilər.
   
   
   
   Ermənilər danışıqları
   
   pozmaq istəyir
   
   
   
   Politoloq Rasim Musabəyov hesab edir ki, Azərbaycanın "Madrid təklifləri" ilə bağlı təqdim etdiyi dəyişikliklər çox böyük ehtimalla sənədə daxil edilib. Ermənilərin danışıqlardan yayınmaq cəhdlərinin də bununla bağlı olduğunu güman edən politoloq deyir ki, ermənilərin DQ-nin statusu ilə bağlı məsələdə mövqeyi dəyişməyib. "Onlar istəyirlər ki, sənəddə statusla bağlı konkret göstərilsin. Həmsədrlər isə Azərbaycanın tələblərini nəzərə alaraq onu sənəddə müəmmalı göstəriblər. Onlar da buna razılaşmaq istəmirlər"- deyən politoloq ermənilər bu mövqeləri üzərində israrla dayanarsa, danışıqların pozulmasını və "Madrid təklifləri"nin ümumiyyətlə gündəlikdən çıxmasını da mümkün sayır. "Hər şey ola bilər, istisna deyil ki, bu təkliflər hansısa şəkildə razılaşdırılmış çərçivə sənəddə təsdiqlənməsə, onda bu təkliflərin də taleyi o birilər kimi ola bilər. Hər halda "Madrid təklifləri"nin o biri təkliflərdən heç bir üstünlüyü yoxdu".
   
   
   
   Çərçivə sazişi imzalana bilər
   
   
   
   Ermənistanın danışıqlardan yayınmaq cəhdini həm də rəsmi İrəvana çərçivə sazişinin imzalanması ilə bağlı artan təzyiqlərlə izah edən politoloq deyir ki, bu təzyiqlər daha çox Rusiya tərəfdən müşahidə edilməkdədi. Azərbaycan tərəfinin artıq danışıqlarla bağlı təkliflərini ortaya qoyduğunu bildirən politoloqa görə, artıq bütün tərəflərin rəsmi Bakının bu vəziyyətin olduğu kimi davam etməsinə yol verməyəcəyini anlayır. Bu baxımdan da politoloq "Madrid prinsipləri"nin çərçivə müqaviləsi şəklində imzalanacağını ehtimal edir. Onun fikrincə, Ermənistanın müqavimətinə baxmayaraq bu sənədi Rusiya Ermənistana imzaladacaq. Bu sənədin münaqişənin həllində ciddi dəyişiklik, əsasən də işğal olunmuş torpaqların azad edilməsi ilə bağlı hər hansı yeniliyə gətirib çıxarmayacağını deyən Musabəyovun fikrincə, çərçivə sazişi sadəcə olaraq konfliktin həlli hüdudlarını özündə əks etdirəcək. Onun fikrincə, sənədin imzalanmasından sonra tərəflər sülh müqaviləsinin imzalanmasına hazırlaşa bilər, lakin burada da tərəflərin nə qədər səy göstərməsi əhəmiyyətli olacaq. "Əgər ermənilər sülh müqaviləsində yenə də istəklərini konkret olaraq dilə gətirməyə başlasalar, bu da təbii ki, yenə vaxtı müəyyən qədər uzadacaq"- deyən politoloq hesab edir ki, ola bilər, sülh müqaviləsinin hazırlanması çərçivə sazişi imzalandıqdan sonra ən azı iki-üç il uzansın.
   
   
   
   Sazişin imzalanmasına
   
   Rusiyadan dəstək?
   
   
   
   Rasim Musabəyov onu da bildirib ki, çərçivə sazişi imzalanarsa, bu saziş münaqişənin sülh yolu ilə həllinə apara bilər, lakin burada da tərəflərə göstərilən təzyiqlər, eyni zamanda tərəflərin özlərinin sülhə nə qədər maraqlı olması da rol oynayacaq. Onun fikrincə, bu sazişin imzalanması ən əsası müharibə ehtimallarını gündəlikdən çıxara bilər. "Həmsədrlər bu sazişin imzalanmasına nail olmaqla rahatlaşa bilərlər. Ermənilər isə sülh müqaviləsinin imzalanmasını bir qədər uzada bilərlər. Çünki çərçivə sazişi konkret olaraq torpaqların azad olunmasına gətirmir. Onun bilavasitə icra mexanizmi yoxdu, amma tərəflərin üzərinə qarşılıqlı öhdəlik qoyulur. Eyni zamanda problemin həlli ilə bağlı hüquqi çərçivə qoyur"- deyən politoloq onu da əlavə edib ki, bu gün çərçivə sazişinin imzalanmasına daha çox Rusiya maraq göstərir. "Rusiya bununla birincisi, bu məsələnin həllinin məhz onun nəzarətində olduğunu nümayiş etdirməyə çalışır. İkincisi, çərçivə sazişində çoxlu müəmmalar qalacaq ki, onun izahatı da yenə Rusiyanın əlində qalacaq. Yəni bir növ problemin həlli tam da olmasa, müəyyən qədər Rusiyanın nəzarəti altına keçə bilər. Amma bu sənədlə belə olacaq, çünki real vəziyyət çərçivə sazişi ilə dəyişmir. Bu sazişlə, sadəcə, sülh əldə etmək görüntüsü yaranır".
   
   
   
   Ermənilər aprel ayına
   
   qədər müxtəlif bəhanələrlə
   
   danışıqları uzadacaqlar
   
   
   
   Rasim Musabəyovun münaqişənin nizamlanması ilə bağlı proqnozları digər politoloqlardan fərqlidi. O hesab edir ki, Ermənistan tərəfi aprel ayına qədər müxtəlif bəhanələrlə danışıqları uzadacaqlar. Ermənilərin hələ də Türkiyənin hansısa addımlar atacağına ümid etdiklərini bildirən politoloqa görə, əgər yaya qədər çərçivə sazişi imzalanmasa, bu halda regionda müharibə ehtimalı yenidən intensivləşməyə başlayacaq. Politoloqun fikrincə, bu, ilkin mərhələdə böyük müharibə şəklində olmasa da, lokal hərbi toqquşmaların baş verməsi qaçılmaz ola bilər ki, bu da məsələlərin yenidən Təhlükəsizlik Şurasına qaytarılmasına gətirib çıxara bilər. Həmsədr dövlətlərin hazırda regionda hərbi toqquşmaların baş verməsinin əleyhinə olduqlarını bildirən politoloqa görə, əgər Minsk Qrupu üzvləri Ermənistanı yola gətirə bilməsələr, Azərbaycanın hərbi əməliyyatlara başlamaq qərarının da qarşısını ala bilməyəcəklər. "Hər halda çərçivə sazişi imzalanmasa, hərbi toqquşmaların baş verməsi ehtimalı sürətlə artacaq"
   
   

Fevralın 1-dən İran Azərbaycan vətəndaşlarına qarşı tətbiq olunan viza rejimini birtərəfli şəkildə ortadan qaldırsa da, sonradan bu ölkənin Azərbaycandakı səfirliyi yeni qaydaların jurnalistlərə aid olmadığını bəyan etdi.
   
   İran qeyri-standart qaydalarla işləyən ölkə olduğundan bu qərara münasibət də birmənalı olmadı. Qeyd edək ki, Azərbaycanda jurnalist fəaliyyəti ilə məşğul olan insanların əksəriyyəti bu ölkənin vətəndaşları olduğundan qonşu ölkədə məhz bu peşə sahiblərinin gediş-gəlişi ilə bağlı prosesin necə tənzimlənəcəyi də maraq doğurmaya bilməz. Qəbul edilən qərarı İranın daxili işi kimi dəyərləndirən Azərbaycan XİN-in mətbuat xidmətinin rəhbəri Elxan Poluxov "Şərq"ə açıqlamasında bildirib ki, ola bilsin, burada jurnalistlərin İrana vətəndaş kimi getməsi deyil, jurnalist fəaliyyəti nəzərdə tutulur. "Biz belə başa düşürük ki, Azərbaycan vətəndaşı olan jurnalistlər vətəndaş kimi yeni qərardan istifadə edə bilərlər. Peşə fəaliyyətləri ilə bağlı isə viza tələb olunur"- deyən mətbuat katibi bu qaydaların digər peşə sahiblərinə tətbiq olunub- olunmadığını bilməsə də, belə bir yeniliyin olmasının mümkünlüyünü də istisna etməyib. Bununla belə o əlavə edib ki, viza rejiminin ləğvi İran tərəfdən birtərəfli şəkildə ləğv edildiyindən rəsmi Bakı buna hər hansı münasibət bildirə bilməz.
   
   

Fevralın 4-ü axşam saatlarından etibarən Naxçıvan Muxtar Respublikasına (MR) güclü qarın yağması ilə əlaqədar işini müvəqqəti dayandıran Naxçıvan Beynəlxalq Hava Limanı bu gün axşam saatlarında fəaliyyətini bərpa edib.
   
   APA-nın yerli bürosu xəbər verir ki, iki günlük fasilədən sonra liman təyyarələrin qəbuluna başlayıb. Limandan APA-ya bildiriblər ki, Bakı-Naxçıvan istiqamətində dünən səhər saatlarında baş tutmalı olan ilk reys üzrə təyyarə ötən gün saat 18:30 radələrində Naxçıvan Beynəlxalq Hava Limanına enib. Əks istiqamətə aviareys yaxın saatlarda Heydər Əliyev Beynəlxalq Hava Limanına doğru istiqamət götürəcək.
   
   

Azərbaycan prezidenti yanında Strateji Araşdırmalar Mərkəzinin (SAM) dəvəti ilə Türkiyənin Beynəlxalq Strateji Araşdırmalar Mərkəzinin (USAD) rəhbəri Cəlal Cem Oğuz fevralın 8-dən 11-dək Azərbaycanda səfərdə olacaq. SAM-dan APA-ya verilən məlumata görə, səfər çərçivəsində türkiyəli qonaq Azərbaycanın rəsmi şəxsləri, elm xadimləri, beynəlxalq münasibətlər üzrə mütəxəssisləri ilə görüşəcək.

Fevralın 11-də Avropa İnsan Haqları Məhkəməsi Azərbaycanla bağlı növbəti qərar çıxaracaq.
   
   APA-nın məhkəmənin mətbuat xidmətinə istinadən verdiyi məlumata görə, Azərbaycan məhkəməsi evi məcburi köçkünlər tərəfindən zəbt edilən Cəfərov soyadlı Azərbaycan vətəndaşının xeyrinə qərar versə də, bu qərar hakimiyyət orqanları tərəfindən icra olunmayıb. Cəfərov bununla bağlı Avropa İnsan Haqları Məhkəməsinə müraciət edib.