Müxalifət düşərgəsində birləşmə cəhdləri iflas təhlükəsiylə üzləşib. Belə ki, bu düşərgənin parlament seçkilərinə yeni seçki blokuyla qatılmaq istəkləri qarşısında olduqca ciddi əngəllər yaranmış kimi görünür. Hər halda, son günlər belə bir seçki blokunun yaradılmasıyla bağlı təkliflərin yeni ittihamlarla əvəzlənməsi belə düşünməyə tamamilə əsas verir.
   
   
   
   Ən azından ona görə ki, cəmisi bir neçə həftə əvvəl birləşmənin mümkünlüyündən danışanların köhnə "palan içi" tökməyə xüsusi həvəs göstərmələri açıq-aşkar nəzərə çarpır. Bu baxımdan, müxalifət düşərgəsinin növbəti parlament seçkilərini də indiki qarşılıqlı münasibətlər sisteminin təsiri altında yola verməli ola biləcəkləri qətiyyən istisna deyil.
   
   Onu da qeyd etmək lazımdır ki, belə vəziyyətin yaranmasının kifayət qədər ciddi səbəbləri mövcuddur. Və həmin səbəblərin mütləq əksəriyyətinin Müsavat və AXCP arasındakı münasibətlərin ənənəvi keyfiyyətindən qaynaqlandığını düşünmək mümkündür. Üstəlik, ortada olduqca paradoksal situasiya da var. Belə ki, Müsavat yeni seçki blokunda iştirak edə biləcək partiyaların sırasını konkretləşdirib. Həmin konkretləşdirməylə yeni seçki blokunun əhatə dairəsi "Elçibəy-Rəsulzadə xəttinə sadiq olan partiyalar" tezisi altında məhdudlaşdırılıb. İndiki qeyri-müəyyən və əlverişsiz situasiya da əslində məhz həmin tezisin ağırlıq yükündən qaynaqlanır.
   
   Məsələ ondadır ki, "Elçibəy-Rəsulzadə xəttinə sadiq olan partiyalar" tezisinin özü kifayət qədər mübahisəli məsələdir. Belə ki, Müsavat bu tezisi irəli sürərkən əsasən AXCP və KXCP ilə əməkdaşlığı nəzərdə tutduğuna eyham vurur. Eyni zamanda, bu tezisin ADP-yə də aid edilə biləcəyini istisna etmir. Və bu tezisin mübahisəli məqamları da məhz bu məqamdan qaynaqlanır.
   
   Məsələ ondadır ki, AXCP-nin "Elçibəy-Rəsulzadə xəttinə sadiq olan partiyalar" tezisinə hansı səviyyədə uyğun gəlməsi açıq-aşkar müəmmalı xarakter daşıyır. Ən azından ona görə ki, vaxtilə AXCP-nin parçalanmasıyla bağlı baş verən proseslər hələ unudulmayıb. Həmin dövrdə indiki AXCP təmsilçiləriylə Elçibəy tərəfdarlarının qarşılıqlı münasibətlərinin hansı keyfiyyətdə olması bu tezisin ciddiliyi ilə bağlı kifayət qədər suallar doğurmaqdadır. Hər halda AXCP-nin mərhum lideri Əbülfəz Elçibəylə indiki sədri Əli Kərimlinin qarşılıqlı münasibətlərində müəyyən ziddiyyətlərin və gərginliyin olması heç kəsə sirr deyil. Hətta bu barədə ölkə mətbuatında da kifayət qədər məlumatlar yer alıb.
   
   Digər tərəfdən, AXCP-nin bir neçə qanada parçalanmasının özündə də siyasi-ideoloji ziddiyyətlərin xüsusir rol oynadığı qətiyyən şübhə doğurmur. Hər halda, bu yeni qurumların nizamnamə və məramnamələrində indi nə yazılmasından asılı olmayaraq, həmin partiyalar "Elçibəy-Rəsulzadə xəttinə sadiq olan partiyalar" tezisinə uyğun fəaliyyət göstərmiş olsaydılar, onda AXCP-nin parçalanmasına ümumiyyətlə, ehtiyac qalmazdı. Əgər parçalanma baş veribsə, deməli, bu siyasi qurumların siyasi xəttində kifayət qədər fərqlər və ziddiyyətlər mövcud olub. İndi həmin qurumları yenidən "Elçibəy-Rəsulzadə xəttinə sadiq olan partiyalar" tezisi altında bir araya gətirmək cəhdləri o qədər də uğurlu variant sayıla bilməz. Bu baxımdan, indiki AXCP ilə KXCP-nin necə ortaq mövqedən çıxış edə biləcəkləri kifayət qədər ciddi suallar doğurmaqdadır.
   
   Təbii ki, eyni sözləri Müsavat-AXCP münasibətlərinə də aid etmək mümkündür. Ən azından ona görə ki, hələ AXCP-nin parçalanmasından əvvəl də Müsavatın Əli Kərimli tərəfdarlarıyla münasibətləri həmişə kəskin ziddiyyətlərlə müşayiət olunub. Üstəlik, Müsavat başqanı İsa Qəmbərlə AXCP sədri Əli Kərimlinin heç vaxt müttəfiqlik meylləriylə diqqəti çəkməkdiklərini də mütləq nəzərə almaq lazımdır. Hər halda, bu iki siyasətçi arasında həmişə davamlı gərginliyin olduğu heç kəsə sirr deyil. Əksinə, bu gərginlik Müsavat və AXCP-nin əsasən bir-birinə əks olan bloklarda yer almasına səbəb olub. Hətta formal birləşmə variantları da son nəticədə Müsavat və AXCP-nin üzv olduqları blokları sərt qarşılıqlı ittihamlarla parçalamalarına yol açıb. Buna misal kimi, 2005-ci ilin parlament seçkilərindən sonra "Azadlıq" bloku ətrafında baş verən prosesləri göstərmək mümkündür. Bu baxımdan, Müsavat və AXCP-nin ortaq seçki blokunda təmsil olunmasına əngəl törədən faktorlar, bunu mümkün edə biləcək amillərdən qat-qat daha ciddi və çoxsaylıdır.
   
   

Dünən Gürcüstanda nəşr olunan "Axali Taoba" qəzetində maraqlı bir xəbər yer alıb. Xəbərdə bildirilir ki, Ermənistan Gürcüstandan tranzit ölkə kimi istifadə edəcək və ölkəsinə hərbi yük daşıyacaq.
   
   
   
   Nəşrin yazdığına görə, "Yaşıllar Partiyası"nın lideri Giorgi Qaçeçiladze bəyan edib ki, Rusiya ilə Gürcüstan sərhədində yerləşən "Yuxarı Lars" sərhəd məntəqəsinin açılması 2006-cı ildə iki ölkə arasında imzalanan sazişin tərkib hissəsidir "Sazişdə söhbət konkret olaraq Rusiya Müdafiə Nazirliyinin maraqlarından irəli gələn tranzit üçün Gürcüstan ərazisindən istifadədən gedir",- deyə Qaçeçiladze bildirib. Onun sözlərinə görə, sazişdə birbaşa qeyd edilib ki, bu, Rusiyanın Ermənistanda yerləşən 102-ci hərbi bazasının ehtiyacları üçün edilir. G.Qaçeçiladze vurğulayıb ki, Rusiya Gürcüstandan Ermənistana hərbi yükün tranziti üçün istifadə edir.
   
   Məsələni şərh edən politoloq Hüseynbala Səlimov isə hesab edir ki, Gürcüstan onun ərazisindən silah-sursatın daşınmasına imkan verməyəcək: "Silah-sursatın daşınacağı ilə bağlı artıq bir neçə gündür ki, müzakirələr aparılır. Gürcüstanla Rusiya arasında sərhəd məntəqəsi açılandan sonra bu məsələ gündəliyə gəlib. Gürcüstan tərəfi dəfələrlə bəyan edib ki, məntəqədən ancaq qeyri-silah, qeyri-hərbi mallar tranzit olunacaq. Dəfələrlə deyilir ki, həmin məntəqədən bir dənə olsun belə silah keçməyəcək. Təbii ki, həmin məntəqənin açılması daha çox Ermənistanla Rusiyanın maraqlarına cavab verir. Rəsmi İrəvan bu hadisəni hətta özünün qələbəsi kimi qələmə verir. Çünki Rusiyanın Ermənistanda hərbi bazası var. Rusiya bu məntəqədən öz hərbi bazası ilə əlaqə saxlamaq istəyir. Amma bir daha qeyd edirəm ki, bunu Gürcüstan tərəfi də nəzərə alır və təminat verir ki, həmin məntəqədən silah-sursat keçirilməyəcək".
   
   Sərhəd məntəqəsinin açılması məsələsində Gürcüstanın vəziyyətini nəzərə almağın vacibliyini qeyd edən H.Səlimov deyib ki, hazırda rəsmi Tiflis çox ağır bir vəziyyətdədir: "Vəziyyətdən çıxmaq üçün rəsmi Tiflis də müəyyən addımlar atır. Çalışır ki, regiondakı digər dövlətlərlə - Ermənistanla, o cümlədən Rusiyanın özü ilə münasibətlərini azacıq da olsa, tarazlasın. O ki qaldı Azərbaycanla strateji müttəfiqlik məsələsinə, mən hesab edirəm ki, bu müttəfiqlik indi də qalmaqdadır. Düşünürəm ki, rəsmi Tiflisin Rusiya ilə sərhəd məntəqəsinin birini açmasını Azərbaycana qarşı etdiyi xəyanət kimi yozmaq düzgün deyil. Gürcüstan dəfələrlə deyib ki, bu məntəqədən Ermənistana silah-sursat daşınmayacaq. Bu məntəqənin hərbi məqsədlər üçün istifadə olunması heç Gürcüstanın da maraqlarına cavab vermir. Gürcüstanın özündə də Cavaxetiya ermənilərilə bağlı problemi var".
   
   

"Yeni Azərbaycan Partiyasının siyahısı ilə parlament seçkisinə qatılan namizədlər özlərinə fond yaratmalıdır".
   
   Bunu APA-ya açıqlamasında Milli Məclisin Aqrar siyasət komitəsinin sədri, Yeni Azərbaycan Partiyası (YAP) Siyasi Şurasının üzvü Eldar İbrahimov deyib. O bildirib ki, ötən parlament seçkilərində namizədlərin tək başına təbliğat-təşviqat işləri ilə məşğul olması müəyyən sistemsizlik yaradıb. O, seçki kampaniyasında namizədlərin buklet, təqvim, plakat və digər müxtəlif formalı təbliğat vasitələri hazırlatdığını xatırladıb: "Hərə özü üçün bir şüar müəyyənləşdirirdi. Kimsə yazırdı ki, mən XXI əsrin deputatıyam. Namizədlərin çoxu isə prezidentlə birgə çəkdirdikləri şəkillərdən istifadə edirdi. Şəxsən mən bunun tərəfdarı deyiləm. Prezident bir partiyanın deyil, bütün ölkənin prezidentidir. Bu fakt beynəlxalq təşkilatlar tərəfindən də müsbət qarşılanmır. Yəni bu cür şüarlarla seçkiyə getmək olmaz. Bu iş mütəşəkkil qaydada olmalıdır" .
   
   E. İbrahimov hesab edir ki, YAP-ın icra katibliyi bu işi öz boynuna götürsə, yaxşı olar: "Belə olsa YAP-ın siyahısından namizədliyi irəli sürülən şəxslərin seçkiyə necə getdikləri müəyyənləşdirilə bilər. Bu işə gecikmədən başlamaq lazımdır. Yaradılacaq fonda namizədlər tərəfindən müəyyən olunmuş məbləğdə pul köçürülməlidir. Həmin vəsait isə təbliğat, təşviqat dövründə namizədlər üçün istifadə olunmalıdır" .

Təhsil naziri Misir Mərdanov mərkəzləşdirilmiş sınaq imtahanlarının nəticələrindən razı qalıb.
   
   Æurnalistlərə açıqlamasında nazir bildirib ki, hələlik nazirlik yalnız bir bölgədə - Bakı, Sumqayıt və Abşeron rayonunda mərkəzləşdirilmiş sınaq imtahanları keçirib. IX və XI siniflərdə keçirilən sınaq imtahanlarının nəticələri ötənilkindən xeyli yüksəkdir. M.Mərdanovun sözlərinə görə, xüsusən IX siniflərin nəticələri daha qaneedicidir: "Ciddi narahatlığa heç bir əsas yoxdur. XI siniflərdə ötənilkindən 7-8 faiz yüksək nəticə əldə olunub".

Azərbaycandakı Axıska türklərinin Gürcüstana qayıdışı ilə bağlı problemlər var.
   
   Bu barədə Azərbaycan Miqrasiya Mərkəzi İctimai Birliyinin prezidenti Əlövsət Əliyev bildirib. O deyib ki, Axıska türklərinin qayıtmasıyla bağlı Gürcüstan Respublikasının Dövlət Proqramı var. Lakin buna baxmayaraq, həmin şəxslərin Gürcüstana qayıtmasına ciddi maneçilik yaradılır. "Axıska türklərinin liderləri hesab edilən şəxslər Gürcüstana buraxılmır" - deyə, Ə.Əliyev bildirib.
   
   O əlavə edib ki, Axıska türklərinin həm Azərbaycanda, həm də Gürcüstanda hüquqlarının pozulması davam edir. Ə.Əliyevin sözlərinə görə, Azərbaycan hökuməti Gürcüstan hökumətilə bu məsələləri diplomatik yolla həll edilməlidir.