"Müsbət mövqe görməsək, səfirimizi Vaşinqtona göndərməyəcəyik". APA-nın "Anadolu" agentliyinə istinadən verdiyi məlumata görə, bu sözləri Türkiyənin baş naziri Rəcəb Tayyib Ərdoğan Səudiyyə Ərəbistanında yerli media mənsublarına açıqlamasında deyib. Kral Faysal Fondu tərəfindən "Kral Faysal İslama Xidmət Mükafatı"na layiq görülən R. T. Ərdoğan mükafatlandırma mərasiminə qatılmaq üçün bu ölkəyə gedib. Kral sarayında keçirilən mərasimdə çıxış edən baş nazir daha sonra səudiyyəli jurnalistlərin suallarını cavablandırıb.
   
   
   
   O, ABŞ Nümayəndələr Palatası Xarici Əlaqələr Komitəsinin uydurma "erməni soyqırımı" ilə bağlı qərarından sonra Türkiyənin hansı addımları atacağı barədə suala belə cavab verib: "Bu qərar Türkiyəni incidib. ABŞ bizim strateji müttəfiqimiz və dostumuzdur. Türkiyə ilə Ermənistan arasında protokolların imzalandığı bir vaxtda belə bir qərarın qəbulu komediyadır. Komitədə komediya səhnələşdirilib. Konqresmenlərin səsvermə zamanı ən gec 5 dəqiqə ərzində salonda olması tələbinə baxmayaraq, sədr ortadan qeyb oldu. Bir neçə saat keçdi. Səsvermə zamanı kokteyl olar? 22 üzv qərarın əleyhinə, 20-si lehinə səs vermişdi. Üzvlərdən 4-ü yox idi. Bu dörd nəfərin 3-nü tapıb gətirdilər. Lakin sonuncunun gəlişini gözləmədən səsvermənin bitdiyini elan etdilər. Bu, Amerika Konqresinə yaraşmır. Belə bir şey olmaz. Bir tərəfdən özünüzü inkişaf etmiş demokratik ölkə elan edirsiniz, digər tərəfdən isə demokratiyaya zidd bütün çirkinlikləri ortaya qoyursunuz".
   
   R. T. Ərdoğan qərara etirazlarını operativ şəkildə bildirərək Vaşinqtondakı səfiri geri çağırdıqlarını xatırladıb: "Bundan sonra qarşı tərəfin hansı mövqe tutacağı bizim üçün önəmlidir. Biz bunu izləyirik. Türkiyə bu cür məsələlərdə çox həssasdır. Qürurumuzla oynanmasına imkan vermərik. ABŞ-ın da bəsit siyasi maraqlar üçün Türkiyə kimi strateji ortağını fəda edəcəyinə inanmıram. ABŞ buna getsə, onda bizim deyəcəyimiz bir şey qalmaz. Biz də durumu ən geniş planda dəyərləndirəcəyik. Ortada konkret nəticə görməsək, səfirimizi Amerikaya göndərməyəcəyik".