Son günlər ölkədə müzakirə edilən məsələlərdən biri də Azərbaycan Ordusunun kiçik çavuşu, 1990-cı il təvəllüdlü Axundzadə Məmmədbağır Talıb oğlunun ermənilər tərəfindən əsir götürülməsidir. Fakt Azərbaycan Müdafiə Nazirliyi tərəfindən təsdiqlənsə də, əsgərin hansı səbəblərdən əsir düşməsi hələ də dəqiqləşməyib. Hərbçi ilə bağlı isə cəmiyyətdə müxtəlif fikirlər səslənir.
   
   
   
   Bəziləri doğrudan da əsgərin əsir götürülməsi ilə razılaşsalar da, digərləri əsgərin könüllü olaraq əsir düşməsi ehtimalının olduğunu güman edirlər. Əsgərin atası isə oğlunun könüllü olaraq erməni tərəfə keçməsini qəbul etmir. O, mətbuata bildirib ki, Məmmədbağır ermənilərə nifrət edirdi, Azərbaycan torpaqlarının erməni işğalından azad olunmasını istəyirdi. "Oğlum heç vaxt ermənilərə könüllü əsir düşməz. Talıb Axundov deyib ki, Məmmədbağır 2010-cu ilin iyul ayına kimi Sərhəd Qoşunlarında həqiqi hərbi xidmət keçib, sonra isə öz arzusu ilə müddətdən artıq xidmət edən çavuş kimi Tərtərdəki hərbi hissədə xidmətə başladı. Onun könüllü olaraq ermənilər tərəfə keçməsi barədə deyilənlər yalandır. Məmmədbağır Vətənini sevməsəydi, hərbi xidmətini başa vurandan sonra yenidən ordu sıralarına qayıtmazdı".
   
   Qeyd edək ki, əsgərin atası oğlunun geri qaytarılmasına yardım etmək üçün Beynəlxalq Qızıl Xaç Komitəsinin (BQXK) Azərbaycan nümayəndəliyinə müraciət edəcəyini də bildirib. Onun sözlərinə görə, dövlət qurumları oğlunun geri qaytarılması üçün nə lazımdırsa, edirlər. Beynəlxalq Qızıl Xaç Komitəsinin də bu işdə öz yardımını göstərməsini xahiş edəcək.
   
   Bütün bu söz-söhbətlərə şərh almaq üçün "Doktrina" Æurnalist Hərbi Araşdırmalar Mərkəzinin rəhbəri Cəsur Sümərinli ilə əlaqə saxladıq. O, "Şərq"ə deyib ki, son illər əsir düşən əsgərlərin tam əksəriyyəti Ermənistan Silahlı Qüvvələri tərəfindən əsir götürülb, bəziləri isə azaraq erməni tərəfə keçib. "Könüllü şəkildə Ermənistana əsir düşmə halları isə qeydə alınmayıb. Bu təcrübədən çıxış edərək deyə bilərəm ki, sonuncu olaraq, Ermənistan tərəfinə əsir düşən əsgərimiz də ya yolunu azıb, ya da erməni kəşfiyyatı onu əsir götürüb. Təbii ki, burada bizim bilmədiyimiz müəyyən səbəblər də ola bilər, hansı ki, onlar hələ ki, mətbuata bəlli deyil. Bununla bağlı Hərbi Prokurorluq və Müdafiə Nazirliyi araşdırma aparmalı və hadisənin dəqiq səbəbini mətbuata açıqlamalıdır. Yalnız bu halda cəmiyyətdəki səs-küyə son qoymaq mümkündür. Əks halda, hər kəs istədiyini danışacaq. Doğrudur, nazirlik M.Talıbovun könüllü olaraq Ermənistana əsir düşməsi faktını təkzib edib. Amma, dəqiq məlumat yalnız araşdırmalardan sonra məlum olacaq". Ermənistan tərəfindən əsir götürülən əsgərin geri qaytarılması üçün BQXK-yə ediləcək müraciətin hansı nəticə verəcəyinə gəldikdə isə C.Sümərinli bildirib ki, ötən illərdə Azərbaycan Milli Ordusunun əsir düşən iki hərbi qulluqçusu öz istəyinə görə BQXK tərəfindən üçüncü ölkəyə göndərildi. "Və buna da səbəb kimi həmin əsgərlərin Azərbaycana qayıtmaq istəməmələri göstərilib. M.Talıbovun isə hansı ölkəni seçməsi öz istəyindən asılı olacaq. Onun qayıtmaq istəməsi və ya üçüncü ölkəni seçməsi onun özündən asılı olan bir şeydir. Amma ən azı həmin əsgər bir neçə ay əsirlikdə qalacaq. Çünki onun qaytarılması ilə bağlı müəyyən prosedurlar var ki, mütləq həmin mərhələlərdən keçmək lazımdır. Bir şeyi də qeyd edim ki, əsgərin hansı ölkəyə qayıtması ona edilən işgəncələrdən də asılıdır. Çünki bəzən bizim əsgərlərə orada işgəncələr edirlər və onların Azərbaycana qayıtmasına mane olurlar. Orada bizim əsgərlərə zülm edərək, onun üçüncü bir dövləti seçməsini tələb edirlər. Təsir altında qalan əsgər də bəzən buna məcbur olur və başqa ölkəyə göndərilir".