2018-09-07 12:47:24   |   695 dəfə oxunub

“Ortaq Türk Tarixi" hazırdır

Dərs vəsaiti Azərbaycan, Türkiyə və Qazaxıstan məktəblərində tədris olunacaq




Ötən gün Beynəlxalq Türk Akademiyasının daimi katibi Asxat Keşikbayev bu ildən etibarən Azərbaycan, Türkiyə və Qazaxıstanın orta məktəblərində "Ortaq Türk Tarixi" fənninin seçmə dərs kimi tədris ediləcəyini açıqlayıb. Bundan sonra Təhsil Nazirliyi orta məktəblərdə "Ortaq Türk Tarixi" fənninin tədrisi ilə bağlı məsələlərə aydınlıq gətirib.

Nazirlikdən bildirilib ki, Beynəlxalq Türk Akademiyası türkdilli ölkələrdən, o cümlədən Azərbaycandan mütəxəssislər cəlb etməklə "Ortaq Türk Tarixi - XV əsrə qədər olan dövr" adlı vəsait artıq hazırdır. Həmin vəsaitin türkdilli ölkələrdə tətbiq edilməsi üçün onun məzmunu əvvəlcə Türkdilli Dövlətlərin Əməkdaşlıq Şurası tərəfindən təsdiqlənməlidir. Məzmun təsdiq edildiyi təqdirdə vəsaitin ölkəmizin dövlət ümumtəhsil məktəblərində fakültativ məşğələ dərslərinin hesabına tədrisi nəzərdə tutula bilər. Nazirlikdən əlavə edilib ki, vəsaitin məzmunu təsdiqlənəcəyi təqdirdə dövlət ümumtəhsil müəssisələrində təhsil alan bütün şagirdlər bu dərsliklə dövlət hesabına təmin olunacaqlar.


Təşəbbüslə bağlı "Şərq"ə danışan tarixçi-alim Boran Əziz "Ortaq Türk Tarixi" fənninin tədris olunmasının çox müsbət addım olacağını deyib. Onun fikrincə, kökü bir olan xalqların qədim tarixinin öyrənilməsi, onlar arasındakı qəsdən unutdurulan əlaqələrin bərpası, yaddaşlarda canlandırılması çox doğru addımdır:

 "Xüsusən, indiki qloballaşma dövründə, beynəlxalq güclərin türk xalqları arasında ayrıseçkilik saldığı bir zamanda belə bir ideyanın ərsəyə gəlməsi doğru yanaşmadır. Çox arzu edərdim ki, təkcə ortaq türk tarixinin deyil, eyni zamanda ortaq türk əlifbasının və dilinin də yaradılması uğrunda çalışmalar sürətləndirilsin. 

Keçən əsrin 20-ci illərinin əvvəllərində Rusiya müsəlmanlarının qurultaylarında, "İttifaqi-müslimin" partiyasının proqram sənədində, o cümlədən 1917-ci ildə Bakıda, may ayında Moskvada ümumrusiya müsəlmanlarının qurultaylarında bu məsələlər geniş müzakirə olunub və təkliflər irəli sürülüb. Hesab edirəm ki, ortaq türk tarixinin yaradılması ümumi məqsəd uğrunda mübarizəyə təkan verəcək. Bunu ancaq alqışlamaq lazımdır".

Tarixçi "Ortaq Türk Tarixi" adlı dərsliyin XV əsrə qədər dövrü əhatə etməsini bu cür şərh edib: "Sözün açığı, "XV əsr" məsələsinə cavab verməkdə çətinlik çəkirəm. Əlbəttə, bu dövrə qədər türk xalqlarının ortaq tarixinin öyrənilməsinin özü müsbət haldır. 

Amma XV əsrə qədər nəyin əsas götürüldüyünü, hadisələrin necə əks olunduğunu bilmirəm. Yeni işlərdə müəyyən nöqsanların olması qaçılmazdır. Lakin bir şeydən əminik ki, bu istiqamətdə görülən işlər bütün türk xalqlarının ümumi faydasınadır. Çox güman ki, bu, ilkin mərhələ üçün nəzərdə tutulub. Ümid edirik, sonrakı mərhələdə XVI-XXI yüzillikləri əhatə edən dövr də dərslik halına salınacaq və orta təhsil müəssisələrində tədris olunacaq".

İsmayıl







SON XƏBƏRLƏR

2018-09-25
2018-09-24