2019-05-24 21:14:43   |   158 dəfə oxunub

Körpələrə elektron qaydada ad verilməsinə MÜNASİBƏT



Valideynlər dünyaya yeni gəlmiş övladlarına ənənəvi olmayan adlarla bağlı müraciət etdikdə, onlara elektron qaydada xəbərdarlıq ediləcək.

Bu barədə "Reaktiv Xidmətlərdən Proaktiv Xidmətlərə” adlı "myGov” portalının (my.gov.az) təqdimat mərasimində çıxış edən Elektron Hökumətin İnkişaf Mərkəzinin direktoru Fariz Cəfərov deyib.

Onun sözlərinə görə, bu funksiya "myGov” layihəsi çərçivəsində istifadəyə verilən "Şəxsi kabinet”ə inteqrasiya olunub:

"Bu xidmət vasitəsilə valideynlər dünyaya yeni gələn övladlarına elektron qaydada ad verə biləcək. Sistem üzərindən uşağa ad verildiyi zaman, adın mənası avtomatik olaraq göstəriləcək. Belə ki, bəzi hallarda valideynlər övladlarına adın mənasını bilmədən qoyurlar. Bəzən qız uşağına oğlan adı və ya ənənəvi olmayan ad qoyulur. Belə olan təqdirdə də sistem üzərindən müvafiq xəbərdarlıq çıxacaq. Ad verdikdən sonra ata və ananın soyadlarına uyğun olaraq, soyad təklifləri də göstəriləcək ki, bu da valideynlərə soyadları hansı formada seçə biləcəklərinə imkan yaradacaq”.

Dilçilik İnstitutunun əməkdaşı, professor Sayalı Sadıqova "Sherg.az”a bildirib ki, Nazirlər Kabineti yanında adlar və soyadlar üzrə komissiya var. Əvvəlcə bu komissiya ilə müzakirələr aparılmalıdır:

"Daha sonra müvafiq lüğətlərin elektron qaydada öz əksini necə tapacağı müzakirə olunmalıdır. Bu kimi məsələlər xüsusi qanunlarla idarə olunur. Əvvəlcə adlar və soyadlar komitəsi və adların mənasını izah edən təşkilatla məsləhətlər aparılmalıdır. Valideynlər üçün "şəxsi kabinet”i yaradılanda qeyd etdiyim qurumlarla müəyyən əlaqələr olmalıdır. Bundan sonra fəaliyyət qurum fəaliyyət göstərə bilər”.

Yeganə Bayramova





SON XƏBƏRLƏR

2019-06-15