Bu gün Azərbaycanın xarici işlər naziri Ceyhun Bayramovla Ermənistanın XİN Ararat Mirzoyan arasında İsveçdə görüş baş tutacaq. Bu barədə Avropa İttifaqının xarici siyasət qurumunun nümayəndəsi Lük Pyer Devin məlumat verib. O, bu görüşün ATƏT nazirlər konfransı çərçivəsində keçirilməsinin nəzərdə tutulduğunu söyləyib.
Bildiyimiz kimi, dekabrın 15-də Azərbaycan və Ermənistan rəhbərlərinin Brüsseldə görüşəcəyi gözlənilir. Maraqlıdır,bu görüşdən öncə XİN başçılarının məlum görüşündə hansı məsələlər ətrafında müzakirələr aparılacaq?
Mövzunu şərh edən keçmiş XİN başçısı Tofiq Zülfüqarov “Sherg.az”a bildirib ki , bu, ATƏT-in hər il nazirlər səviyyəsində təşkil etdiyi ənənəvi görüşdür:
“ Belə görüşlərdə ATƏT-in fəaliyyəti nəzərdən keçirilir və ona aid sənədlər qəbul edilir. ATƏT-in Minsk qrupu uzun müddətdir ki, Ermənistan-Azərbaycan arasındakı münaqişənin həllində vasitəçilik edirdi. Hazırda isə onun bu istiqamətdəki fəaliyyəti müəyyən olunmayıb. Hər iki tərəfin bununla bağlı öz baxışları var. Rəsmi Bakı hesab edir ki, bu humanitar mövzulara aid ola bilər”.
T.Zülfüqarov görüşdə hər iki tərəfin yekun sənədlərdə və ya hansısa bəyanatda mövqelərini əks etdirməyə çalışacaqlarını vurğulayıb:
“Görüşə hazırlıq müddətində Vyanada olan daimi nümayəndəliyimiz lazımlı işləri görüb. Burada hər hansısa sənədin imzalanması istisna deyil”.
