“Mina problemi hələ də qalmaqdadır. İşğaldan azad olunan ərazilərdə mülki şəxslərlə yanaşı çalışanlar, hərbçilər də minaya düşür".
"Report" xəbər verir ki, bunu Azərbaycan Prezidentinin köməkçisi - Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev jurnalistlərə açıqlamasında mina problemi ilə bağlı məsləyə münasibət bildirib.
Prezidentin köməkçisi vurğulayıb ki, bu Ermənistanın Azərbaycana qarşı uzun illər həyata keçirdiyi mənfur siyasətinin növbəti nümunəsidir: "Eyni zamanda bu, mənfur siyasəti başqa vasitələrlə həyata keçirməsidir. Bu ərazilərin kütləvi şəkildə minalanmasında Ermənistanın əsas məqsədi Azərbaycanın işğaldan azad edilmiş ərazilərində quruculuq və məcburi köçkünlərimizin qayıdışı prosesinə mane olmaq və maksimum dərəcədə Azərbaycana mülki və hərbi insanları arasında ölüm hallarına nail olmaqdır. Minanın nə məqsədlə qoyulduğunu hər kəs yaxşı başa düşür. İnsanların daşıdığı vəzifədən və statusundan asılı olmayaraq mina öz qurbanlarını gözləyir. Bu, bəzən də illər ərzində orada duraraq öz fəlakətli nəticəsini gözləyən dəhşətli faciədir. Təəssüflər olsun ki, Ermənistan tərəfindən də Azərbaycan ərazilərinin minalarla çirkləndirilməsi həyata keçirilib. Azərbaycan beynəlxalq ictimaiyyət qarşısında da bu məsələni qaldırıb. Bir daha da beynəlxalq ictimaiyyətə müraciət etmək istəyirik ki, bu məsələdə məlumatlandırma artırılmalıdır. Azərbaycanın minatəmizləmə fəaliyyətlərinə də dəstək artırılmalıdır. Xüsusilə BMT və onun strukturları tərəfindən dəstəyin artırılmasına ehtiyac var”.
"Hər birimizi mina təhlükəsi gözləyir. Vətəndaşlarımızdan çox şey asılıdır. Vətəndaşlarımız işğaldan azad olunmuş əraziıərə gedəndə diqqətli olmalıdır. Hər bir insan minanın potensial qurbanı ola bilər”, -Hikmət Hacıyev qeyd edib.
