"Mən anlamıram ki, bu adamlar hansı məntiqlə belə iddia ilə çıxış edirlər"
"Koronavirus pandemiyası ilə bağlı təhlil və şərhlər verərkən ehtiyatlı olmaq lazımdır".
Bunu "Sherg.az"a açıqlamasında Vəhdət Partiyasının sədr müavini Vasif Əfəndiyev deyib.
Partiya təmsilçisi bəyan edib ki, bu cür şayiələr müəyyən fəsadlara gətirib çıxara bilər:
"Bəzi provakatorlar iddia edirlər ki, guya Azərbaycanda virusdan ölüm sayı gizlədilir. Mən anlamıram ki, bu adamlar hansı məntiqlə belə iddia ilə çıxış edirlər. Bu sayaq məlumatı yaymaq üçün ilk növbədə sübutlar olmalıdır. Bu gün bütün dünya şəffaflıq içərisindədir. Baş vermiş hər hansı bir hadisə nə qədər ciddi-cəhdlə gizlədilməyə çalışılsa da, ən qısa müddətə gerçək ortaya çıxır. Hər kəsin əlində canlı yayıma imkan verən alətlər var. Sosial şəbəklərin bu qədər aktiv olduğu bir şəraitdə kütləvi ölüm sayını və ya hər hansı bir qlobal hadisəni uzun müddət gizlətmək mümkün deyil".
Analitikə görə, bundan başqa beynəlxalq qurumlar qarşısında götürdüyümüz ciddi öhdəlikləri var:
"Bu hadisə Azərbaycanın daxili işi deyil. Koronavirus təhlükəsi ÜST tərəfindən elan olunmuş pandemiyadır. Bu isə o anlama gəlir ki, baş verən hadisələr bütün dünyanın diqqət mərkəzindədir. Əgər hər hansı saxta məlumat verən ölkə olarsa, ona qarşı çox ciddi tədbirlər görülə bilər. Təsəvvür edin, Avropa və ABŞ insan həyatını qurtarmaq üçün trilyonlarla pul xərcləyir, ancaq hansısa dövlət virusdan ölənlərin sayını gizlədir. Bu məsuliyyətsizliyi edənləri ən yaxşı halda birbaşa həbs edib beynəlxalq məhkəməyə verərlər. Ona görə də belə məqamlarda kifayət qədər həssas olmaq şərtdir".
