Araik Arutyunyan açıq şəkildə etiraf edir ki, Azərbaycan Ordusuna qarşı “cəbhə xətti” formalaşdırıblar
Qarabağda separatçı-terrorçular yeni müharibəyə hazırlaşır. Baş separatçı Araik Arutyunyanın “proqram” xarakterli çıxışı bunu təsdiqləyir. Separatçıların başçısı deyir ki, “silahlar haqqında qanuna dəyişikliklərlə silah əldə etmək imkanları genişləndiriləcək”. Bununla bağlı qondarma “qanun layihəsi” mart ayında irəli sürülüb. Məsələ Qarabağdakı erməni mülki əhalinin də silahlanmasından ibarətdir.
Siyasi şərhçi Asif Nərimanlı hesab edir ki, bu məqam bir neçə məsələni ön plana çıxarır. Analitikin fikrincə, separatçılar gələcək toqquşmalara hazırlaşır:
“Burada həm mümkün anti-terror əməliyyatlarına qarşı “müdafiə olunmaq”, həm də iddia etdikləri keçmiş “DQMV”-nin “ərazisini” bərpa etmək niyyətləri var. Separatçılar Qarabağdakı mülki erməniləri də terrorçuya çevirir. Onların nə vaxtsa Azərbaycan vətəndaşlığını qəbul etməsi imkanlarını sıradan çıxarır. Mülki ermənilər silah tuşladıqları ölkənin vətəndaşı olmaqdan çəkinəcəklər. Separatçılarda silahların sayı mülki əhaliyə də paylayacaq qədərdir. 44 günlük müharibədən sonra bu qədər silahın olması təsadüfi deyil. Bu, Laçın dəhlizindən kiçikçaplı silahların Qarabağa daşındığı, dəhlizdən zaman-zaman erməni dəstələrinin keçidinə icazə verən rus sülhməramlılarının mülki avtomobillərin yük yerində kiçikçaplı silahların keçirilməsinə şərait yaratdığı fikrini önə çıxarır. Separatçılar Azərbaycana qarşı mülki əhalidən ibarət “könüllü dəstələr” formalaşdırır.”
A.Nərimanlıya görə, ən vacib məsələ Laçın dəhlizindən silah-sursat daşınmasıdır: “İstisna deyil ki, yüklər dəhlizə vizual nəzarət edən Azərbaycan hərbçilərinin görə bilməyəcəyi kiçikçaplı silahlar, o cümlədən, artilleriya mərmiləri və s. ibarətdir. Araik onu da qeyd edir ki, “cəbhə xəttinin möhkəmləndirilməsi, funksiyalarının lazımi şəkildə yerinə yetirilməsi üçün xeyli iş görülüb”. Baş separatçı açıq şəkildə etiraf edir ki, Azərbaycan Ordusuna qarşı “cəbhə xətti” formalaşdırıblar və rus sülhməramlılarının dayandığı mövqelərlə yanaşı, erməni terrorçuların da postları var. Qarabağa qanunsuz səfər edən Ermənistan Müdafiə naziri Arşak Karapetyan da terrorçuların qurduğu postlarda olub. Görünən budur ki, müharibənin başa çatmasından bir il sonra Qarabağda separatizm yenidən güc toplayır”.
