“Zəfər Günü Azərbaycanın tarix səhifələrinə qızıl hərflərlə yazıldı”.
Bunu Sherg.az.a açıqlamasında politoloq Elman Vəliyev deyib. Politoloq qeyd edib ki, bu günlər Azərbaycan tarixində unudulmaz izlər buraxdı: “Tarixə nəzər yetirən hər kəs bu səhifələri görəcək. Cəmi 44 gündə bu qədər ərazini az itki verməklə, necə azad edildiyi hər zaman heyranlıq yaradacaq. Bu həqiqət Prezidentin təcrübəli strategiyası, Azərbaycan xalqının əzmkarlığı və igidlərin qəhrəmanlığı nəticəsində oldu. Müharibə ərəfəsində olan təzyiqlər, təxribatlar, ajiotajlar bizi sındıra bilmədi. Azərbaycan beynəlxalq hüququn özün müdafiə qanuna istinad edərək ərazi bütövlüyünü bərpa etdi. 30 illik status-kvonu birdəfəlik dəyişdi. Ermənistanın dilinə gətirdiyi status məsələsini də Azərbaycan birmənalı olaraq təkzib edərək, bunun xülyadan başqa bir şey olmadığını bəyan elədi”.
E.Vəliyev qeyd edib ki, Prezidentin Zəfər Günündə Zəfər yolunun açılışını etməsi də əlamətdar hadisədir:
“Bu yol Zəfər aparan yoldur. Azərbaycana gələn əcnəbilər də bu yoldan istifadə edəcəklər və bu yolun niyə Zəfər yolu adlandırdığını biləcəklər. Bu yolun böyük zəfərə, qələbəyə apardığını, 30 illik hicrana son qoyduğunu öyrənəcəklər. Dünya belə bir möhtəşəm qələbənin şahidi oldu. Fəxr edirəm ki, bu qələbəni mən də yaşadım. Bu vüsala yetmək üçün neçə-neçə arzusu nakam qalanlar var idi! Artıq biz gələcək illərdə çiçəklənən Qarabağı görəcəyik. Nəinki biz, dünya bunun şahidi olacaq. Azərbaycanın paxıllığını çəkənlər isə sinələri dərdli kimi yaşayacaqlar. Buna heç şübhəm yoxdur”.
