"Əgər məhkəmə hakimiyyətində də qüsurlar varsa, şəffaflıqdan söhbət getmirsə, vətəndaşın ümid yeri qalmır"
"Məsələ kadr seçimindədir. Kadrlar düzgün işləməlidir ki, idarəçilikdə problem olmasın".
Bu sözləri Prezident İlham Əliyevin korrupsiyaya qarşı mübarizə islahatlarını, baş prokuror dəyişikliyini və həmçinin icra başçılarının həbsini "Sherg.az"a şərh edən millət vəkili Fazil Mustafa deyib.
Onun sözlərinə görə, məhkəmə hakimiyyətinin fəaliyyəti də ciddi diqqət və nəzarət tələb edir: "Uğurlu idarəçilik üçün iki əsas məqam çox vacibdir: düzgün kadr seçimi və prinsiplərin hamıya aydın olması. Dövlət başçısı öz prinsiplərini bütün məmurlara deyib. Qalır, onların tapşırıqlara əməl etməsi. Bəzən məmurlar vətəndaşları incidirlər. Vətəndaş da məhkəməyə müraciət edir. Əgər məhkəmə hakimiyyətində də qüsurlar varsa, şəffaflıqdan söhbət getmirsə, vətəndaşın ümid yeri qalmır. Ona görə də lazım gəldiyi hallarda, məhkəmə hakimiyyətində islahatlar aparılmalıdır. Şəffaflıq yaradıldıqdan sonra vətəndaşlar islahatların aparıcı qüvvəsinə çevrilə bilərlər".
Millət vəkili, həmçinin vurğulayıb ki, dövlət başçısı öz vətəndaşlıq mövqeyi ilə hər kəsə nümunə olur:
"Artıq idarəçilik üslubu dəyişib. Hər şey camaatın gözü qarşısında olur. Tanınmayan, bilinməyən adamlar vəzifəyə təyin edilmir. Prezidentin son günlər qəbul etdiyi qərarlar da onun insanlara olan qayğısından xəbər verir. Belə ki, dövlət başçısı fövqəladə hallarda belə vətəndaşlara qayğını unutmur, onları diqqətdə saxlayır. Bu, məmurlar üçün nümunə olmalıdır".
