Azərbaycanda da turizm elçiləri layihəsinə start verilməlidir
Türkiyə turizm sahəsində könüllü elçilər xidmətindən istifadə edir. Məlumdur ki, Türkiyə turizmin inkişaf etdiyi ölkələr arasında ön sıralardadır. İl boyu bu ölkəni milyonlarla əcnəbi ziyarət edir. Həm turizmin daha da inkişaf etməsi, turistlərin rahatlığı, həm də gənclərin təcrübəsini artırması baxımından könüllülərin işə cəlb olunması müsbət hal hesab edilir. "Könüllü turizm elçiləri” layihəsi İstanbulun Fatih bələdiyyəsi tərəfindən artıq 9-cu dəfədir ki, həyata keçirilir.
450 könüllü məhz İstanbulun Fatih bölgəsində turistlərə tarixi və mədəni yerləri gəzib görməkdə köməklik göstərir. Maraqlı cəhətlərdən biri də budur ki, könüllülər xüsusi geyimlərlə təchiz edilir. Köynəklərin üzərində isə ingilis dilində - "Məndən soruş” sözləri yazılıb. Bələdiyyə orqanı hesab edir ki, bununla turistlər üçün əlverişli şərait yaradılmış olur. Könüllülər də razıdırlar və bildirirlər ki, bu iş nəticəsində xarici dil biliklərini zənginləşdirir, təcrübə qazanırlar.
"Könüllü turizm elçiləri” layihəsinin nədən diqqətimizi çəkdiyi, bizcə, qaranlıq məsələ deyil. Azərbaycan da son illərdə turizm sahəsində xeyli irəliləyişə nail olub. Ölkəmizə gələn qonaqların sayı getdikcə artmaqdadı və hamımız turizmin daha da inkişaf etməsinə nəyləsə, bacardığımız bir işlə kömək göstərməliyik. Çünki ölkəmizə gələnlərin sayının artması, ölkəmizin daha da çox tanınması deməkdir.
Bu prizmadan yanaşdıqda bizdə də könüllü turizm elçiləri layihəsi icra oluna bilərmi və bunun turizmin inkişafında müsbət rolu ola bilərmi?
Turizm məsələləri üzrə ekspert, iqtisadçı Elxan Vəliyev "Şərq”ə açıqlamasında hər şeyin niyyətə bağlı olduğunu dedi:
- Niyyət təmizdirsə, əlbəttə, yaxşı layihədir. Bir ölkəyə gələn turistlərin sayında artım varsa, belə layihələrin icrası mümkündür. Bunu qeyri-hökumət mənşəli təşkilatlar, yaxud başqa, özəl qurum və şirkətlər, təşkilatlar edə bilər. Baxır, hansı niyyətlə layihə icra olunur. Əslində, mən bu işə çox da müsbət baxmıram. Çünki turizmlə peşəkarlar məşğul olmalıdır. Tutalım, könüllü gənclər deyirsə ki, bələdçilik sayəsində xarici dil biliklərini, danışıqlarını təkmilləşdirirlər, düşünürəm ki, əksinə, xaricilərə onların dilində peşəkarcasına danışa bilənlər bələdçilik etməlidir. Azərbaycanda da ingilis, ərəb dilli qruplar var. Bir sıra hallarda bizim gənclər də xaricilərlə ünsiyyət yaradır, turizm şirkətləri ilə birgə çalışıb turistlərə bələdçilik edirlər. Bütün hallarda fikrimcə, bu işlə peşəkarlar, xarici dildə qüsursuz danışa bilənlər məşğul olmalıdır. Belədə əcnəbi vətəndaşlar daha da rahat olacaq və qarşılarındakına etibar edəcəklər.
E.Vəliyev hesab edir ki, turistlərə kömək etmək, yol göstərmək, doğru ünvana yönləndirmək ölkə və onun əhalisi haqqında müsbət fikir formalaşdırır. Amma bu hadisələr epizodikdir. Əksər hallarda turistlər səfərə xüsusi turizm şirkətləri xətti ilə və təcrübəli bələdçilərlə çıxır:
- Son zamanlarsa, xaricilər də bicləşib. Özləri gəlib burda şirkət açır, tur-səfərlər təşkil edirlər. Məsələn, iranlı turistlərə bələdçilik edən iranlı olur. İraqlıya iraqlı bələdçilik edir və sairə. Sizcə, bir iranlı öz həmyerlisinə etibar edər, yoxsa, tanımadığı bələdçiyə. Xarici ölkəyə səfərə çıxanlar yanlarında öz həmyerlilərinin olmasını daha çox arzulayırlar. Xarici ölkə bələdçiləri də bizim turizm şirkətləri ilə birgə çalışır. Turizmin inkişafı tur-operatorların işlərini düzgün təşkil etməsindən də çox asılıdır. Bizim problemimiz budur ki, tur-operatorlar, bir məsəldə deyildiyi kimi, hamıya eyni gözlə baxırlar. Yəni, xariciyə hansı qiyməti təyin edirsə, yerli əhaliyə də o qiyməti təyin edir. Ona görə də yerli turizm zəif inkişaf edir. Ancaq əcnəbilərə ümid etməli oluruq. Türkiyədə isə bu sahə fərqlidir. Orada turizm polisi, turizm müfəttişliyi var və turizm şirkətlərinin işinə nəzarət edirlər.
Məlahət Rzayeva
