Eldəniz Əmirov: “Metroda differensial tarif 99% halda qiymət artımı deməkdir”
"Metroda differensial qiymət artımı ola bilər".
Bunu jurnalistlərə açıqlamasında "Bakı Metropoliteni"nin sədrinin müşaviri Emil Əhmədov bildirib.
O qeyd edib ki, "Bakı Metropoliteni" QSC qiymətlərin artırılması və azaldılması kimi bir səlahiyyətə sahib olmadığı üçün bu gün bu mövzu müzakirə olunmur, amma differensial qiymət artımı ola bilər.
"Gündəmdə olan məsələlərdəndir, amma bunun üçün tamamlama, infrastuktur işləri, yeni stansiyaların açılması, müvafiq ödəniş sistemlərinin tətbiqi və s. kimi məsələlər var. Yəni ki, differensial qiymət artımı gələcəkdə ola bilər, nəzərdə tutulur, amma bu gün bu barədə yekun bir qərar yoxdur",- deyə E.Əhmədov bildirib.
İqtisadçı ekspert Eldəniz Əmirov Sherg.az-a söyləyib ki, differensial qiymət artımı, yəni qiymətin differensial şəkildə müəyyən edilməsi deməkdir:
"Yəni burada həm artım, həm də azalma da ola bilər. Lakin 99% halda qiymətlərdə artım baş verəcəyi gözlənilir. Azalma ehtimalı isə nəzərə alınmır. Buna görə də, diferensial dəyər bu artımla müşahidə olunacaq. Diferensiallıq isə müxtəliflik deməkdir, yəni fərqli qiymət dərəcələri müəyyən ediləcək. Burada müştərilərin metrodan hansı saatlarda və ən böyük ehtimalla hansı stansiyalardan daha çox istifadə etməsi nəzərə alınacaq.
Başqa sözlə desək, diferensiallıq müştərilərin metro stansiyalarından istifadəsinə bağlıdır. Yəni metroya "Dərnəgül"də minib “Həzi Aslanov”da düşən və sonra başqa stansiyalardan istifadə edən şəxslə, yalnız bir stansiyadan istifadə edən şəxsin dəyəri fərqli olacaq. Amma bunun üçün güclü infrastruktur vacibdir. Məsələn, haradan bilinsin ki, müştəri 1 stansiyadan yoxsa, 5 stansiyadan sonra düşəcək. Sistem bunu əvvəlcədən müəyyən etməlidir".
Ekspert əlavə edib ki, ödənişlər sistemi müştərinin stansiyadan çıxışını əvvəlcədən hesaba almalıdır:
"Texniki proseslərdə, xüsusilə infrastruktur baxımından, müştəri metroya daxil olduqda hansı stansiyada çıxacağı nəzərə alınır və ödəniş onun çıxışı zamanı tamamlanır. Bu sistem o qədər də nə sadə, nə də mürəkkəb deyil. Ancaq infrastruktur hazır olduqdan sonra bu mümkündür. Həmçinin sözügedən tarif lazımlıdır. Çünki 10 stansiyadan istifadə edənlə iki stansiyadan istifadə edən şəxsin eyni ödənişi ödəməsi düzgün olmaz".
