Uzunmüddətli sülhün bərqərar olması üçün prinsipial razılıq əldə edilməlidir
ABŞ Prezidenti Donald Tramp Vaşinqtonun İsrail və HƏMAS arasında atəşkəs rejiminin pozulması məsələsini araşdıracaq və lazımi addımlar atacağını bəyan edib.
Tramp bu barədə Floridadan Vaşinqtona qayıdarkən jurnalistlərə bildirib.
“Biz baş verənləri öyrənəcəyik. HƏMAS-la bağlı məsələnin tamamilə sülh yolu ilə həll olunmasını istəyirik. Bildiyiniz kimi, onlar bəzən aqressiv davranır, atəş açıblar. Ola bilsin ki, bu, HƏMAS rəhbərliyinin deyil, daxildəki narazı qrupların işidir. Hər halda biz bu məsələ ilə ciddi şəkildə məşğul olacağıq”, - o qeyd edib.
ABŞ lideri həmçinin əlavə edib ki, məsələ ilə bağlı növbəti addımlar hazırda nəzərdən keçirilir.
Politoloq Taleh Əliyev Sherg.az-a bildirib ki, Yaxın Şərqdə keçirilən Sülh Samitinin İsrailHamas münaqişəsini tam şəkildə həll edəcəyi inandırıcı görünmədiyini daha öncə də bildirmişdi:
"Çünki sülh danışıqlarının birinci mərhələsində əsas diqqət əsirlərin qaytarılması, Rəfah keçid məntəqəsinin açılması və həlak olmuş israilli girovların cəsədlərinin İsrail tərəfinə təhvil verilməsi kimi məsələlərə yönəlmişdi.
Lakin sülh prosesinin ikinci mərhələsinə aid məsələlərdə tərəflər arasındakı ciddi fikir ayrılığı göstərirdi ki, bu mərhələ birinci qədər “ildırım sürəti” ilə həyata keçirilməyəcək. Əslində, prosesin ən çətin və həlledici mərhələsi də məhz ikinci mərhələ hesab olunur. Qəzzanın bərpası, beynəlxalq idarəetmə sisteminin yaradılması və Qəzzaya sülhməramlı qüvvələrin yerləşdirilməsi kimi məsələlərdə razılaşmanın olmaması, hazırkı gərginliyin, hətta bundan sonra daha dərin gərginliyin yaranmasına səbəb ola bilər. Bunun nəticəsində yaxın gələcəkdə İsrail ilə HƏMAS arasında müharibənin yeni bir fazasının başlanması ehtimalı da istisna deyil. Çünki ikinci mərhələ ilə bağlı atılan addımlar hələ də qeyri-müəyyən xarakter daşıyır. Bu qeyri-müəyyənlik artıq prosesin başlanğıcında özünü göstərməkdədir".
Analitikin fikrincə, Qardaş Türkiyə, Misir Ərəb Respublikası və Qətər Dövləti müharibənin yenidən aktiv fazaya keçməsinin qarşısını almaq üçün müəyyən səylər göstərə bilər:
"Lakin bu, hələ sülh demək deyil. Bu, sadəcə olaraq münaqişənin müvəqqəti dondurulması, yəni müharibənin yenidən alovlanmasının bir qədər yubadılması anlamına gəlir.
Daimi və uzunmüddətli sülhün bərqərar olması üçün isə ilk növbədə prinsipial razılıq əldə edilməlidir".
