Səbuhi Rəhimli: "Maaşlar vaxtında verilmirsə, bunun AY və Günəş tutulmasına dəxli yoxdur"
Mart ayının 14-də ilin ilk Ay tutulması baş verəcək.
Bu barədə Şamaxı Astrofizika Rəsədxanası məlumat yayıb.
Bildirilib ki, bu tutulma tam Ay tutulması olacaq.
Bildirilib ki, tutulma hadisəsi Şimali və Cənubi Amerika, Avstraliyanın çox hissəsi, Avropanın qərbi, Asiyanın şərq hissəsi, Sakit və Atlantik okeanı, Arktika və Antarktidanı əhatə edəcək:
"Bakı vaxtı ilə saat 07:57-də başlayacaq və 14:00-da bitəcək. Ümumilikdə tutulma 6 saat davam edəcək, tam tutulma isə saat 10:26-da başlayıb saat 11:31-də bitəcək. Tam tutulmanın maksimumu saat 10:58-də olacaq".
Qeyd edilib ki, gözlənilən tam Ay tutulması yerli vaxtla gündüz saatlarına uyğun gəldiyi və Ay üfüqdən aşağıda olacağı üçün Azərbaycandan görünməyəcək.
Mövzu ilə bağlı danışan "Qoroskop" qəzetinin baş redaktoru, astroloq Səbuhi Rəhimli “Sherg.az”a deyib ki, Ayın və Günəşin tutulmasının ciddi təsir mexanizmi yoxdur:
“Azərbaycanda Ay tutulması müşahidə olunmayacaq. Yalnız Qərbi Avropada, Afrikada, xüsusən də Afrikanın şimalında, Atlantik və Sakit okeanlarda görünəcək. Amma qız bürcündə də ayın tutulması var. Ümumiyyətlə Ay və Günəş tutulmasında hansısa bürcə müsbət və mənfi təsir mexanizmi yoxdur. Bu, sadəcə astronomik prosesdir və təbii hadisələrə təsir edə bilər. Yəni dəniz və okean sularında qabarmalara səbəb ola bilər. Novruz ərəfəsində insanlar kasıb olsalar da onsuz da müsbət ovqatları var. Maaşlar vaxtında verilmirsə, bunun AY və Günəş tutulmasına dəxli yoxdur. İnsanın əlinə pul gəlmirsə, planetlərin necə olmasından asılı olmayaraq ovqatı aşağı olur. Ay tutulmasını hər şey ilə əlaqələndirmək doğru deyil”.
