Respublika Təcili və Təxirəsalınmaz Tibbi Yardım Mərkəzinə dünən 19:30 radələrindən etibarən Xətai, Binəqədi, Suraxanı, Sabunçu və Qaradağ rayonlarının ərazisindən tonqalda xəsarət alma ilə bağlı 6 müraciət daxil olub.
Bu barədə TƏBİB-dən APA-nın sorğusuna cavab olaraq bildirilib.
Qeyd edilib ki, çağırış ünvanlarına dərhal təcili tibbi yardım briqadaları cəlb olunub:
"Xəsarət alan 8 yaşlı (qadın cinsli) azyaşlı hər iki qolun və qarın nahiyəsinin termiki yanığı diaqnozu ilə Nərimanov Tibb Mərkəzinin nəzdindəki Yanıq Mərkəzinə hospitalizasiya olunub. Digər xəsarət alan 5, 6 və 11 yaşlı (kişi cinsli) azyaşlılara isə bədənin müxtəlif nahiyələrinin yüngül termiki yanığı diaqnozu ilə yerində tibbi xidmət göstərilib. 2 azyaşlının isə tibbi xidmətdən imtinası qeydə alınıb".
Təhlükəsizlik məsələləri üzrə ekspert Elmar Nurəliyev "Sherg.az"a açıqlamasında bildirib ki, tonqal qalayarkən, təhlükəsizlik məsələsinə ciddi riayət etmək lazımdır:
“Tonqal qalamaq və üzərindən atlamaq, həm yanğın təhlükəsinə, həm də insanların yıxılıb xəsarət almasına səbəb ola bilər. Ona görə mütləq tonqal üzərindən hoppanarkən növbəlilik prinsiplərinə riayət etmək lazımdır. Yəni gərək valideynlər uşaqları nəzarətsiz buraxmasın. Uşaqlara, tonqal ətrafında təhlükəli hərəkətlər etməməyə və yaxud da kimsə tonqal üzərindən atlanarkən onlara hörmətlə yanaşmaq, əngəlləmək, lüzumsuz zarafatlar etmək yolverilməzdir. Bu kimi hərəkətlər sonda bədbəxt hadisəyə səbəb ola bilər. Yalnız növbəlilik əsasında, valideynlərin uşaqları nəzarəti altında bunlar həyata keçirməlidir ki, bədbəxt hadisə baş vermə təhlükəsi də olmasın. Həmçinin tonqal tam sönəndən sonra həmin ərazini tərk etmək vacibdir. Tonqalın közünün qalması əlverişsiz və yaxud da küləkli hava şəraitində yayılaraq yanğın təhlükəsi yarada bilər”.
