Bir çox insan üçün sadiqlik münasibətin təməl daşlarından biridir. Lakin işə xəyanət qarışanda, böyük zəhmətlə qurulmuş etibar sarsılır.
Sherg.az xəbər verir ki, münasibət terapevti Ammanda Major, bəzi geniş yayılmış cütlük səhvlərinin xəyanətə zəmin hazırlaya biləcəyini bildirir.
“Netflix”-in yeni serialı “Cheat: Unfinished Business” üçün aparılan araşdırmaya görə, Böyük Britaniyada hər üç nəfərdən biri həyat yoldaşına xəyanət edir.
Ən çox xəyanət edilən və ən sadiq şəhərlər
Araşdırmada xəyanətin ən çox baş verdiyi şəhər 41 faizlə Nottingham olub. Ən sadiq şəhər isə 83 faizlik göstərici ilə Sunderland seçilib. Bu göstərici, Sunderland sakinlərinin əksəriyyətinin münasibətlərində tərəfdaşlarına sadiq qaldıqlarını göstərir. Lakin mütəxəssislərə görə, xəyanət həmişə münasibətdə böyük bir böhran olduğu anlamına gəlmir.
“Bəzən münasibəti xilas etmə fürsəti olur”
Münasibət və cinsəllik terapevti Ammanda Major “The Mirror” qəzetinə verdiyi açıqlamada, xəyanətin bəzən bir münasibəti xilas etmə fürsəti yaratdığını qeyd edib.
“Çatışmayan sevgini kənarda axtarır”
Major, bir münasibətdə xəyanətə zəmin hazırlayan ən böyük səhvin emosional uzaqlıq olduğunu vurğulayıb:
“Bəzi cütlüklər xəyanət səbəbilə terapiyaya gəlir. Digərlərində isə xəyanət, uzun müddətdir davam edən problemlərin nəticəsi olur. Bu insanlar başqa biri ilə emosional və ya fiziki yaxınlıq quraraq, əslində münasibətlərində olmayan sevgi və diqqəti kənarda axtarırlar.”
Xəyanətdən sonra münasibəti davam etdirmək mümkündür
Majora görə, xəyanətdən sonra bəzi cütlüklər münasibətlərini davam etdirmək qərarı verir. Lakin bu, asan bir proses deyil. Etibarın yenidən qurulması və xəyanətin təsirlərinin azalması zaman tələb edir.
Xəyanətin tərifi insana görə dəyişir
Həmçinin xəyanətin nə olduğu da insandan insana fərqlənir. Bəziləri tərəfdaşının sosial şəbəkələrdə başqaları ilə flirt etməsini xəyanət kimi qəbul edərkən, bəziləri bunu ciddi saymır.
“Xəyanət bəzən münasibəti gücləndirə bilər”
Major əlavə edib: “Xəyanət bəzən partnyorlar üçün bir oyanış ola bilər. Cütlüklər bu böhranı aşdıqdan sonra daha sevgi dolu bir ünsiyyət qururlar. Münasibətləri əvvəlkindən daha güclü bir hal ala bilir.”
