Şimali Kipr Türk Cümhuriyyətinin (ŞKTC) Seçki Komissiyasının qeyri-rəsmi nəticələrə əsasən, prezident seçkilərində Cümhuriyyətçi Türk Partiyasının (CTP) sədri Tufan Erhürman qalib gəlib.
Teleqraf xəbər verir ki, o, səsvermədə hazırkı Prezident Ərsin Tatardan üstün olub.
Seçkinin qeyri-rəsmi nəticəsi məlum olan kimi Cənubi Kipr lideri Nikos Xristodulidis Erhürmanı (adanın yunan tərəfi) təbrik edərək, ən qısa vaxtda onunla görüşməyi səbirsizliklə gözlədiyini bildirib.
“BMT baş katibi Antonio Quterreşin elan etdiyi öhdəlik çərçivəsində Kipr probleminin həllinə dair əsaslı danışıqların Kran-Montanada kəsildiyi nöqtədən yenidən başlanması istiqamətində səylərə töhfə verməyə hazır olduğumu, güclü siyasi iradəmi və qətiyyətimi bir daha ifadə edirəm. Bu baxımdan, baş katib tərəfindən elan edilən qarşıdakı qeyri-rəsmi genişləndirilmiş görüş prosesin yenidən başlanması üçün mühüm bir fürsət yaradır. Kipr probleminin həlli BMT qərarları, Təhlükəsizlik Şurasının qətnamələri və Kipr Respublikasının üzvü olduğu və üzv qalacağı Avropa İttifaqının prinsipləri və dəyərləri əsasında olmalıdır”, - Xristodulidis vurğulayıb.
Kran-Montanada aparılan sülh danışıqları uğursuz başa çatdıqdan sonra Türkiyə və Şimali Kipr Türk Cümhuriyyəti iki dövlətli həll variantından başqa heç bir seçimi qəbul etməyəcəklərini bəyan etmişdi. Kran-Montana danışıqları adanın hər iki tərəfinin federasiyada birləşdirilməsini nəzərdə tuturdu. Tufan Erhürmanın bu varianta müsbət baxdığına dair iddialar var.
