Gürcüstanın Baş naziri İrakli Kobaxidze ATƏT-in fəaliyyətdə olan sədri, Finlandiyanın xarici işlər naziri Elina Valtonenlə planlaşdırılmış görüşü ləğv edib.
Bu barədə Gürcüstan hökumətindən bildirilib.
Vurğulanıb ki, buna səbəb E.Valtonenin ötən gün Tbilisidə keçirilmiş qanunsuz mitinqdə iştirak etməsi və yalan bəyanatlar verməsidir.
Qeyd edək ki, E.Valtonen Tbilisidə Gürcüstan parlamentinin binası önündə keçirilən aksiyanın dinc olduğunu qeyd edib və aksiyaçılara dəstəyini bildirib. Onun sözlərinə görə, etirazçılar Gürcüstanın irəlilədiyi istiqamətdən narahatdırlar və insanlar əsas azadlıqlardan məhrum edilirlər.
Beynəlxalq məsələlər üzrə mütəxəssis Əziz Əlibəyli Sherg.az-a bildirib ki, Gürcüstanla Qərb arasındakı münasibətlər getdikcə pisləşir:
"Xüsusilə də “Gürcü Arzusu” partiyasının qalib gəlməsindən sonra Qərb hesab edir ki, ölkədə baş verən proseslərdə ciddi antidemokratik yanaşmalar var.
Qərb, o cümlədən, “xarici agentlər haqqında” qanunun qəbulunun əleyhinə çıxış edir. Çünki Gürcüstandakı Qərb agenturası, xüsusilə də QHT-lər səviyyəsində fəaliyyət göstərir və onlar əvvəllər hakimiyyət dəyişikliyində, çevrilişlərdə, “narıncı inqilab” kimi proseslərdə mühüm rol oynamış sosial bazanı təmsil edirlər. Bu qurumların sosial təbəqədəki təxminən bir neçə yüz nəfərlik fəal dəstəkçi çevrəsi var. Lakin son seçkilərdən sonra Gürcü ictimaiyyətinin hakimiyyəti açıq şəkildə dəstəkləməsi Qərb ilə münasibətləri daha da gərginləşdirdi. Çünki inqilaba nail ola bilmədikdən, seçkidə də udurduqlarından sonra artıq bu cür təzyiq mexanizmlərini işə salacaqlar.
Ehtimal olunur ki, qarşıdakı dövrdə Avropa inteqrasiyası istiqamətində Gürcüstana ciddi zərbələr vurulacaq. Xüsusilə də Rusiya ilə adının hallanması və bu kontekstdə cəzalandırılması prosesi davam edəcək".
