Gürcüstanın hakim “Gürcü Arzusu” partiyasının Konstitusiya məhkəməsində qaldıracağı iddiaya əsasən ölkədə 10-a yaxın siyasi partiyanın fəaliyyətinin qadağan ediləcəyi gözlənilir.
APA-nın yerli bürosu xəbər verir ki, bu barədə partiyanın sədri, Gürcüstanın Baş naziri İrakli Kobaxidze İctimai telekanala müsahibəsində bildirib.
Onun sözlərinə görə, iddia hazırlanır və partiyaların dəqiq sayı bir neçə gündən sonra açıqlanacaq.
İ. Kobaxidze qeyd edib ki, siyahıda illərlə dövlət əleyhinə təxribatla məşğul olan partiyalar, həmçinin Vahid Milli Hərəkatın idarəçiliyi dövründə dövlət vəzifələri tutmuş şəxslərin lideri olduğu birliklər yer alacaq.
Baş nazirin fikrincə, partiyaların ləğvi siyasi plüralizmə təkan verəcək və sağlam siyasi qüvvələrin meydana çıxmasına şərait yaradacaq.
