“Baş nazir Nikol Paşinyan Ermənistan Statistika Komitəsinin hesabatına əsaslanan rəqəmləri açıqlayıb, deməli, onlar tamamilə doğrudur”.
Teleqraf xəbər verir ki, bu barədə Ermənistanın iqtisadiyyat naziri Gevorq Papoyan deyib.
Xatırladaq ki, Rusiya Prezidenti Vladimir Putin və Nikol Paşinyan MDB-nin Düşənbədə keçirilən sammitində iki ölkə arasında ticarət dövriyyəsinin həcminə dair mübahisə ediblər.
Putin bildirib ki, Avrasiya İqtisadi Birliyinə üzv ölkələr üçün yeni bazarlar açır və iqtisadi fayda qazandırır. Nümunə kimi Rusiya lideri Rusiya ilə Ermənistan arasında ticarət dövriyyəsinin artdığını qeyd edərək, Paşinyandan rəqəmlər göstərməyi xahiş edib.
“Bu il artıq 4 milyard dollardır”, - Paşinyan bildirib.
"Xeyr, daha çox”, - deyən Putin Paşinyanla razılaşmayıb.
Ermənistan baş naziri ötənilki rəqəmləri göstərib, amma bu məsələdə də iki lider arasında fikir ayrılığı yaranıb.
“Keçən il bu, təqribən 9 milyard olub”, - Paşinyan qeyd edib.
Putin yenə ona etiraz edib: “Daha çox idi. Keçən il daha çox idi, bu il də çox olacaq. Bu, göz qabağındadır, amma vacib deyil”.
