Ermənistan parlamentinin sədri Alen Simonyanı onun müavini Ruben Rubinyan əvəzləyə bilər.
Teleqraf xəbər verir ki, bu barədə “Hraparak” məlumat yayıb.
Ermənistan nəşri yazıb ki, Rubinyanın son günlər həddindən artıq fəallığı da hakim komanda daxilində qızğın müzakirələrə səbəb olub:
“Vitse-spiker tez-tez meydanda ən müxatəlif mövzulara dair şərhləri ilə görünməyə başlayıb. Deyilənə görə, bu fəallığın bir məqsədi var: gələcək parlamentdə spiker vəzifəsini tutmaq.
Üstəlik, hakim “Vətəndaş Müqaviləsi” Partiyasının İdarə Heyətinə son seçkilərdə Alen Simonyan aldığı səslərə görə Ruben Rubinyandan geri qalıb. Hakim partiyanın üzvləri hesab edirlər ki, Alen Simonyan artıq bu vəzifəyə iddia edə bilməz.
Spiker kürsüsünə başqa gözlər də baxır, məsələn, Hayk Koncoryan və Lilit Makunts. Məlumata görə, Baş nazir Nikol Paşinyan bu yüksək vəzifəyə də qadın təyin etmək istəyir. O, qadınların xidmətləri və fədakarlığından razıdır”.
Nəşr bu baxımdan ABŞ-dəki keçmiş səfir Lilit Makuntsun şansının öz rəqiblərindən daha çox olduğunu iddia edib.
