Düşünmürəm ki, Tramp Gürcüstanla münasibətlərin korlanmasının tərəfdarı olacaq
Əsas təşəbbüs Gürcüstanın öz üzərinə düşəcək
Gürcüstan Baş naziri İrakli Kobaxidze ABŞ-nin ölkəsi ilə münasibətləri normallaşdırması istiqamətində addım atmamasını “təəccüblü” adlandırıb.
O, Prezident Donald Tramp ilə hakim “Gürcü Arzusu” Partiyasının dəyərlərinin tam uyğun olduğunu söyləyib.
O qeyd edib ki, münasibətlərin bərpasının daha da uzanması Dərin dövlətin qələbəsinə gətirib çıxara bilər. Kobaxidzenin fikrincə, Dərin dövlət hazırda ABŞ Dövlət Departamenti üzərində böyük təsirə malikdir.
“Gəlin səbirli olaq və görək, sonda kim qalib gələcək. Əsas odur ki, bizim bəyanatımıza cavab olaraq yeni administrasiyanın konkret addımlarını görək. Biz keçmişi — inqilabın təşviqini, USAID-i, NED-i, bütün bu məsələləri unuda bilərik. Təmiz səhifə və konkret istiqamətlərlə ABŞ və Gürcüstan tərəflərinin maraqlarına uyğun istənilən məsələni müzakirə etməyə, bütün bunları yeni razılaşmada əks etdirməyə də hazırıq”, - Gürcüstan lideri vurğulayıb.
Politoloq Samir Hümbətov Sherg.az-a bildirib ki, Gürcüstan hökuməti, hazırkı Kobaxidze hakimiyyəti ABŞ ilə münasibətləri normallaşdırmağa çalışır:
"Onlar iki ölkə arasında müəyyən gərginliyin mövcud olduğunu yaxşı anlayırlar və bu vəziyyətin açıq şəkildə diqqət çəkməsi də təsadüfi deyil. Bununla belə, düşünmürəm ki, Donald Tramp Gürcüstanla münasibətlərin korlanmasının tərəfdarı olacaq. Böyük ehtimalla tərəflər münasibətləri yaxşılaşdırmaq istiqamətində addımlar atmağa çalışacaqlar. Lakin Trampın siyasi yanaşmasının biznesçi və ticarət yönümlü olması bu prosesi bir qədər fərqli istiqamətə yönəldə bilər. Yəni, əgər Gürcüstan ABŞ ilə əlaqələri bərpa etməyə və inkişaf etdirməyə çalışacaqsa, bu, iqtisadi, həmçinin hərbi sahədə konkret əməkdaşlıq addımları ilə müşayiət olunacaq; Məsələn, Amerika istehsalı olan avadanlıqların, təyyarələrin və ya silahların alınması kimi. Trampın münasibətləri normallaşdırmağa maraq göstərməsi üçün Gürcüstan ya ABŞ üçün strateji baxımdan mühüm bir tərəfdaş olmalı, ya da iqtisadi baxımdan qarşılıqlı fayda təmin etməlidir. Buna görə də əsas təşəbbüs Gürcüstanın öz üzərinə düşəcək".
Analitikin fikrincə, yaxın vaxtlarda ABŞ və Gürcüstan arasında bu məsələdə müəyyən irəliləyişlərin müşahidə olunması mümkündür:
"Lakin eyni zamanda, Gürcüstan hakimiyyətinin Rusiya meyilli siyasətə müəyyən qədər açıq olması da bu prosesə təsir edən amillərdən biri ola bilər. Bu, həmçinin ABŞ–Rusiya münasibətlərindəki ümumi fonun necə dəyişəcəyindən də asılı olacaq".
