İspaniyanın "Elçe" klubu çoxillik ənəsindən imtina etməyi qərara alıb.
Teleqraf xəbər verir ki, komandanın ev oyunlarını keçirdiyi "Martines Valero" stadionunda tum satışı və istifadəsinə qadağa qoyulub.
Səbəb kimi təmizlik xərclərinin artması və azarkeşlərin oyun zamanı çırtlayaraq atdıqları tum qabıqlarının yaratdığı antisanitariya göstərilib. Beləliklə, İspaniyada sevimli qəlyanaltı sayılan "pipas" tumları daha azarkeşlər üçün əlçatan olmayacaq.
Klubdan bildirilib ki, tum qabıqları struktur problemləri yaradır: boruları tıxayır, oturacaqları, rəng və örtüyü pis vəziyyətə salır, siçovul və göyərçinlər cəlb edir, ən əsası, tribunaların sanitar durumunu təhlükə altında qoyur. İşçilərin tam qüvvə ilə çalışmalarına baxmayaraq, hər oyundan sonra stadionu tam təmizləmək mümkünsüzdür.
Qeyd edək ki, "Martines Valero" stadionu 31 388 tamaşaçı tutumuna malikdir. "Elçe" hazırda Sequndada sona 5 tur qalmış 22 komanda arasında 68 xalla liderdir və La Liqaya vəsiqə qazanmağa namizəddir.
