Zaur Məmmədov: “Rusiya və Ukraynanın sülhə baxışı fərqlidir – barış üçün böyük razılaşma lazımdır"
"Birbaşa Rusiya-Ukrayna danışıqlarının üçüncü raundunun asan olacağı gözlənilmir, bu, çox çətin söhbət olacaq". Bunu Rusiya prezidentinin mətbuat katibi Dmitri Peskov deyib. Kremlin nümayəndəsi bildirib ki, nəticə barədə danışmaq üçün Moskva danışıqların necə getdiyini görməlidir: "Təbii ki, heç kim belə "asan yol" gözləmir. Memorandumların layihələri diametral şəkildə əksdir". Qeyd edək ki, 12 nəfərdən 14 nəfərə qədər genişləndirilən Ukrayna nümayəndə heyətinə Ukrayna Milli Təhlükəsizlik və Müdafiə Şurasının katibi Rüstəm Umerov başçılıq edir. Heyətin tərkibində həmçinin Xarici İşlər Nazirliyinin, Prezident Ofisinin, Ukrayna Silahlı Qüvvələrinin, Təhlükəsizlik və Kəşfiyyat Xidmətinin nümayəndələri də var. Rusiya tərəfini isə Prezidentin köməkçisi Vladimir Medinskinin başçılıq etdiyi nümayəndə heyəti təmsil edir. Rusiya və Ukrayna arasında son vaxtlar vasitəçilərin cəlb edilməsi ilə sülh müzakirələrinin yenidən canlandırılması təşəbbüsləri gündəmdədir. İstanbuldakı görüş iki ölkə arasında uzun fasilədən sonra təşkil olunan nadir diplomatik təmaslardan biri kimi qiymətləndirilir. Bildirilir ki, Rusiya tərəfi ilə danışıqlar zamanı onlar İstanbulda Ukrayna və Rusiya prezidentləri Volodimir Zelenski və Vladimir Putinin mümkün görüşünü müzakirə etməyi planlaşdırırlar.
Politoloq Zaur Məmmədov Sherg.az-a deyib ki, Rusiya və Ukrayna danışıqlarında ancaq humanitar məsələlərin həllində irəliləyişdən söhbət gedir. Ekspert vurğulayıb ki, İstanbul görüşlərində adətən hərbi əsir və girovların dəyişdirilməsi kimi məsələlər müzakirə olunur:
"Bundan əvvəlki İstanbul görüşlərinin nəticələri də təxminən eynidir. Ancaq ümumən, tərəflərin masa arxasında müzakirəsi önəmlidir. Təbii ki, əsas gözlənti siyasi məsələlərin müzakirəsi və müharibənin dayanmasıdır. Lakin İstanbul danışıqlarında bu məsələnin müzakirə predmeti olacağı ilə bağlı nə Moskvadan, nə də Kiyevdən açıqlamalar var. Hər kəs başa düşür ki, bu görüş Rusiya-Ukrayna müharibəsinin daha da dərinləşməsinin qarşısını almaq məqsədi daşıyır. Yaxud da tərəflər danışıq xatirinə danışıqlara qatılırlar".
Z.Məmmədov əlavə edib ki, Rusiya və Ukrayna arasında atəşkəsin əldə olunması üçün ilk növbədə ABŞ prezidenti ilə Rusiya rəhbəri görüşməlidir:
"Eyni zamanda Ukrayna prezidenti ilə Kreml rəhbəri arasında təmas olmalıdır. Hələlik bununla bağlı gündəlikdə heç nə yoxdur. Tramp və Putin arasında Çində sentyabr ayında görüş gözlənilir. Ancaq sentyabra da ay yarım zaman var. Tərəflər də liderlərin görüşünə çalışırlar. Bunun üçün proqram olmalıdır. Hazırda Rusiya və Ukraynanın mövqeyi kəskin şəkildə fərqlənir. Moskva birmənalı tələb edir ki, Kiyev və beynəlxalq ictimaiyyət nəinki Krımın, üstəlik, bu gün rus ordusunun nəzarətində olan 4 vilayəti də "Rusiya ərazisi" kimi tanımalıdır. Həmçinin, Ukrayna ordusunda hərbçilərin sayının azaldılmasını tələb edir. Əlbəttə ki, Ukrayna bu tələblərin heç biri ilə razılaşmır".
