Vaşinqtonda ABŞ Dövlət Departamentinin ənənəvi media brifinqi keçirilib. Tədbirdə ABŞ Dövlət Departamentinin mətbuat katibi Temmi Bryus yerli və xarici jurnalistlərin aktual mövzularla bağlı suallarını cavablandırıb. Brifinqdə iştirak edən jurnalist və hüquq müdafiəçisi Əhməd Şahidov Yaxın Şərqdə, xüsusilə də Suriyanın şimalında artan gərginlik fonunda Türkiyə və İsrail arasında mümkün hərbi qarşıdurma ehtimalı ilə bağlı sual ünvanlayıb.
Əhməd Şahidov bildirib ki, bəzi İsrail rəsmiləri “İrandan sonra növbəti hədəf Türkiyə ola bilər” fikrini səsləndirirlər. Eyni zamanda, Türkiyədə İsrailə qarşı ictimai narazılıq artır və bəzi şəxslər hətta türk ordusunun Qəzzaya daxil olması çağırışlarını edirlər:
“Suriyanın şimalında gərginlik artır və burada Türkiyə ilə İsrail kimi ölkələr arasında ziddiyyətli maraqlar görünür. İsrail tərəfindən "İrandan sonra növbəti hədəf Türkiyə ola bilər" kimi fikirlər səslənir. Türkiyədə isə anti-İsrail əhvali-ruhiyyəsi güclənir və bəziləri türk ordusunun Qəzzaya daxil olmasını tələb edir. Prezident Rəcəb Tayyib Ərdoğan isə bildirib ki, "Suriyanın parçalanmasına imkan verməyəcəyik". Bu da Türkiyənin bu məsələdə sərt mövqe sərgilədiyini göstərir. Belə bir şəraitdə Türkiyə və İsrail arasında birbaşa hərbi qarşıdurma riski nə dərəcədə realdır? İsrailin ABŞ-nin yaxın müttəfiqi, Türkiyənin isə NATO-nun əsas üzvlərindən biri olduğu bir zamanda, ABŞ Dövlət Departamenti bu artan gərginliyi necə qiymətləndirir? ABŞ belə bir qarşıdurmanın qarşısını almaq və balansı qorumaq üçün nə edir?”.
Temmi Bryus cavabında bildirib ki, bölgədə vəziyyət həssasdır və müxtəlif fikirlərin səslənməsi təbiidir. Lakin ABŞ hökuməti bu tip qarşıdurmaların baş verəcəyinə dair hər hansı bir əlamət görmür:
"Türkiyə və İsrail, eləcə də həmin region barədə danışarkən deyə bilərəm ki, burada vəziyyət çox gərgindir və müxtəlif sözlər deyiləcək. Amma Suriya ilə bağlı məsələlərdə bütün tərəflər üzrə zorakılığın səngidiyini görürük. İnsanların danışdığı və ehtimal etdiyi fəaliyyətləri biz müşahidə etmirik. Son zamanlarda Prezident Donald Tramp və dövlət katibi Marko Rubio Hindistan-Pakistan arasında yaşanmış çox təhlükəli vəziyyətlərdə olduğu kimi dərhal müdaxilə edərək gərginliyi aradan qaldıra biliblər. Liderlərimiz sülhü qorumaq və bu sülhü təhdid edən istənilən dinamikaya qarşı tədbir görmək üçün tam hazırlıqlıdırlar. İnsanlar real vəziyyətə diqqət yetirməlidirlər. Onsuz da dünya kifayət qədər narahatlıq doğurur. Amma biz bu vəziyyətdən çıxmaq üçün güclü liderlərə malikik. Və insanlarda qorxu yaratmaq məqsədi daşıyan şayiələrə, təbliğat xarakterli fikirlərə və konspirasiya nəzəriyyələrinə aldanmaq lazım deyil".
T.Bryus əlavə edib ki, ABŞ rəhbərliyi regionda sabitliyin qorunması üçün səylərini davam etdirir və belə gərginliklərin qarşısını almaq üçün diplomatik vasitələrdən istifadə edir.
