Rusiya Təhlükəsizlik Şurasının sədr müavini Dmitri Medvedev ABŞ Prezidenti Donald Trampın rusiyalı həmkarı Vladimir Putinlə Budapeştdə keçiriləcək görüşü ləğv etməsi və Vaşiqtonun ölkəsinə qarşı yeni sanksiyalar tətbiq etməsini şərh edib.
Teleqraf xəbər verir ki, o, bu barədə Teleqram kanalında yazıb.
"Trampın Budapeşt sammitini ləğv etməsi. ABŞ-nin ölkəmizə qarşı yeni sanksiyaları. Başqa nə olacaq? "Tomahawk"lardan başqa yeni silahlar veriləcəkmi?
ABŞ bizim düşmənimizdir. Onların danışqan "sülhməramlısı" indi tamamilə Rusiya ilə müharibə yoluna qədəm qoyub. Bəli, o hələ ki, Kiyevin tərəfində açıq şəkildə döyüşmür, amma bu, artıq onun münaqişəsidir, Baydenin deyil! Əlbəttə, deyəcəklər ki, başqa çıxış yolu yox idi, Konqres təzyiq göstərmişdi və sair. Amma bu əsas fakti dəyişmir: qəbul edilən qərarlar Rusiyaya qarşı müharibə aktıdır. İndi Tramp tamamilə avropalı "dəlilər"lə həmrəydir",- Dmitri Medvedev bildirib.
Rusiya rəsmisi həmçinin qeyd edib ki, bu vəziyyət münaqişədə quru əməliyyatlarla hərbi güc tətbiq etməyə üstünlük verilməsi imkanını da artırır və diplomatik danışıqların əhəmiyyətini azaldır:
"Mənasız sazişlər bağlamaq yox, düşmənləri məhv etmək vacibdir".
