Ukrayna-Rusiya müharibəsi davam etdikcə, həm cəbhədə, həm də beynəlxalq siyasi arenada mühüm dəyişikliklər baş verir. Son aylarda Rusiya ordusu bəzi istiqamətlərdə irəliləməyə çalışsa da, Ukrayna Qərbdən silah və maliyyə dəstəyi almağa davam edir. Lakin Avropa ölkələrində bu yardımın uzunmüddətli davamlılığı ilə bağlı müzakirələr aparılır, bu da müharibənin gedişatına birbaşa təsir göstərə bilər. Digər tərəfdən, Türkiyə və Səudiyyə Ərəbistanı kimi ölkələr sülh danışıqlarına vasitəçilik etməyə çalışır. Beynəlxalq diplomatik təşəbbüslər artırılsa da, tərəflər arasında konkret razılaşmanın əldə olunması hələ də çətin görünür. Eyni zamanda, Ukrayna Prezidenti Volodimir Zelenskinin mümkün istefası və ölkədə gözlənilən siyasi dəyişikliklər də müharibənin gələcək trayektoriyasına təsir edə bilər.
Sosial Tədqiqatlar Mərkəzinin sektor müdiri, politoloq Tural İsmayılov “Sherg.az”a söyləyib ki, Ukrayna-Rusiya müharibəsi artıq sona çatmaq üzrədir:
“Səudiyyə Ərəbistanında ABŞ və Rusiya siyasi rəhbərliyi arasında aparılan danışıqlardan sonra Ukrayna müharibəsində yeni mərhələyə qədəm qoyulduğunu müşahidə etdik. Türkiyə də Rusiya və Amerika arasındakı münasibətlərin həlliylə bağlı görüş baş tutdu. Bütün bunlar imkan verir ki, bundan sonrakı dövrdə Rusiya və Ukrayna arasında etimad və barış mühiti əldə edilsin. Hesab edirəm ki, qarşıda çox ciddi hədəflər və planlar var. Rifahın gəlməsi və bölgədə sağlam münasibətlərin olması üçün mütləq şəkildə sülh mühiti formalaşmalıdır. Bunun fərqində olan Ukrayna və Rusiya tərəfi indiki məqam üçün silahların yerə qoyulmasını məqbul hesab edirlər. Ukraynanın vəziyyətinin bundan sonra nece olacağını söyləmək çox çətindir. Çünki Ukraynanı müharibədən sonrakı dövrdə quruculuq prosesi gözləyir. Ukrayna ərazisində böyük dağıntılar baş verib və onların aradan qaldırılması üçün xeyli zaman lazımdır. Hər bir halda iki dövlətin münasibətləri bərpa etmək istəməsi və aktiv döyüş fazası əməliyyatlarının arxa plana keçirilməsi üçün tərəflər arasında razılaşmaların olması bölgə üçün tarixi əhəmiyyətə malikdir. Fikrimcə, Ukraynada Zelenksi bundan sonra uzun müddət hakimiyyətdə qalmayacaq. Lakin iki ölkə arasında razılaşmadan dərhal sonra Zelenskinin prezidentlik postunu dərk edəcəyini düşünmürəm”.
