Almaniyada ifrat sağçı Almaniya üçün Alternativ Partiyasına (AfD) və onunla əməkdaşlığa qarşı etiraz aksiyaları bazar günü də davam edib.
AZƏRTAC yerli mediaya istinadla xəbər verir ki, mitinqlərin ən böyüyü Berlində təşkil olunub. Təxminən 160 min nəfərin qatıldığı mitinqdə “yanğın divarı” olaraq adlandırılan, digər partiyaların AfD ilə heç bir əməkdaşlığa getməməsi barədə siyasətin davam etdirilməsi tələb olunub.
Mitinqdə hazırladığı qanun layihəsinin parlamentdə qəbul olunması üçün AfD ilə əməkdaşlıqdan imtina etməyən Xristian Demokratlar İttifaqına (CDU) və onun lideri, Xristian Birlik partiyalarının Kansler vəzifəsinə namizədi Fridrix Mertsə qarşı etirazlar səsləndirilib. Bir neçə gün əvvəl CDU-dan istefa verən publisist Mişel Fridman mitinqdəki çıxışında AfD-ni “nifrət partiyası” adlandırıb. O, CDU/CSU-nun miqrasiya siyasətinin sərtləşdirilməsinə dair qanunun qəbulu üçün AfD ilə birlikdə səs verməsini bağışlanmaz səhv kimi dəyərləndirib.
Berlinlə yanaşı, Potsdam şəhərində də etiraz aksiyası təşkil olunub.
Qeyd edək ki, CDU-nun ölkədə miqrasiya siyasətinin sərtləşdirilməsi ilə bağlı təklifinin yanvarın 29-da Bundestaqda keçirilən səsvermədə AfD-nin dəstəyi ilə qəbul edilməsi ölkədə genişmiqyaslı etirazlara səbəb olmuşdu. Birliyin yanvarın 31-də parlamentdə səsə qoyulan qanun layihəsi isə AfD-nin və digər partiyaların dəstəyinə baxmayaraq, qəbul olunmasa da, ölkədə etirazlar davam etdirilib.
