Tramp isə ümid edir ki, Si Cinpinlə ortaq dil tapa bilər
ABŞ Prezidenti Donald Tramp andiçmə mərasimindən sonra Çin lideri Si Cinpinlə danışıb.
Ağ Ev rəhbəri bunu “Fox News” telekanalına müsahibəsində bildirib.
Tramp Çin lideri ilə çox yaxşı şəxsi münasibətlərinin olduğunu vurğulayıb.
Qeyd edək ki, bundan əvvəl Donald Tramp vəzifəsinin icrasına başladıqdan sonra 100 gün ərzində Çinə səfər edəcəyini planlaşdırırdı. Həmçinin Tramp müşavirlərinə Çin Sədri Si Cinpinlə əlaqələri gücləndirmək üçün bu ölkəyə getmək arzusunu bildirmişdi.
Politoloq Elxan Şahinoğlu "Sherg.az"a bildirib ki, ABŞ Prezidenti Donald Tramp müxtəlif ölkələr kimi Çinə də rüsumların artırılmasını tətbiq etsə də, sonradan bunu dondurdu:
"Tramp ümid edir ki, Si Cinpinlə ortaq dil tapa bilər. Təsadüfi deyil ki, onların telefon danışığı da baş tutub. ABŞ Prezidenti Si Cinpini dost adlandırsa da, əslində bu ölkəyə qarşı sərt siyasət yürüdür. Düşünür ki, ticarət balansı Çinin xeyrinə olduğuna görə bunu dəyişmək lazımdır. Eyni zamanda iki ölkənin lideri arasında yenidən telefon danışığına və ya Ağ Evdə görüşə ehtiyac yarana bilər. Aydındır ki, indiki halda Tramp Pekinə səfər etməz. O, Ağ Evdə Si Cinpini gözləyəcək. Elə bu yaxınlarda Yaponiyanın Baş naziri yapon məhsullarına olan rüsumun artmasını istəmədiyini bildirmək üçün Ağ Evə getmişdi. Bunun müqabilində iqtisadi əməkdaşlıqları gücləndirəcəyini vəd edib. Yaponiyanın Baş naziri ABŞ-dən daha çox sıxılmış qaz alacaq və nəticədə bu ölkəyə yatırımları artıracaq".
Politoloq vurğulayıb ki, Si Cinpin yaxın zamanlarda Trampla yox, Rusiya Prezidenti ilə görüşəcək:
"Putin Si Cinpini mayın 9-da Böyük Vətən müharibəsinin 80 illiyi münasibətilə Moskvaya dəvət edib. Sentyabrda Pekində keçiriləcək oxşar tədbirlərdə isə Rusiya Prezidenti də iştirak edəcək. Putin Cinpinin Trampla yox, onunla yaxınlaşmasını və güclü əlaqələr qurmasını istəyir. Lakin Çin üçün ABŞ bazarı çox vacibdir. Çünki rəsmi Pekinin Rusiya iqtisadiyyatında yatırımları yoxdur. Əvvəllər neft alsa da, son zamanlar ABŞ-nin sanksiyalarından ehtiyatlandığı üçün azaldıb. Buna görə də Cinpin Trampla ticarət əmədaşlığını genişləndirməyə maraqlıdır. Rusiya isə onun siyasi baxımdan tərəfdaşıdır".
