İsrailin 15 aydan çox davam edən hücumlarından sonra əldə olunan atəşkəsə baxmayaraq, yardımların məhdudlaşdırılması səbəbindən sığınacaq və istilik problemlərinin yaşandığı Qəzzada soyuq hava şəraiti bölgə xalqının əziyyətini artırır.
Sherg.az xəbər verir ki, Fələstinin rəsmi xəbər agentliyi WAFA-nın səhiyyə mənbələrinə istinadən verdiyi məlumata görə, Qəzzada üç uşaq şiddətli soyuqdan ölüb.
Mənbələr soyuq havanın təsirli olduğu Qəzzada bir çox uşağın vəziyyətinin "kritik" olduğunu bildirib.
Qəzzada soyuqdan ölən uşaqların sayı 10-a çatıb.
Hökumətin Qəzzadakı Media Ofisinin məlumatına görə, daha əvvəl Qəzzada şiddətli soyuqdan 7 uşaq dünyasını dəyişib.
İsrailin Qəzzaya 15 aydan artıqdır davam edən hücumları zamanı 14 mini dağıntılar altında itkin düşənlər də daxil olmaqla 61 mindən çox fələstinli ölüb, 2 milyon insan isə didərgin düşüb.
Hücumlar, həmçinin məcburi köçkün fələstinlilərin sığındıqları xəstəxanalar, evlər və məktəbləri hədəf alaraq Qəzza zolağının infrastrukturunun 88 faizini məhv edib.
İsrailin uzun müddətdir Qəzzaya humanitar yardımları blokadada saxlaması səbəbindən bölgə xalqının qida, təmiz su, sığınacaq və istilik materialları kimi yardımlara ehtiyacı var.
