Qəzzada xüsusi bir bölgə yaranarsa, nəticədə İsrail və Türkiyə arasında müharibə baş verə bilər
Türkiyə Fələstin məsələsində uzun illərdir davam edən bir yanaşmaya malikdir. Cümhuriyyətin əsas dövlət siyasətində Şərqi Qüdsün Fələstinin paytaxtı olmasının təmin edilməsi prinsipi ön planda durur. Bu yanaşma, həm beynəlxalq hüququn tələbləri, həm də Türk cəmiyyətinin geniş mənada qəbul etdiyi bir modeldir. Lakin son dövrlərdə, xüsusilə Fələstinin Qəzza bölgəsində baş verən gərginliklər və siyasi təzyiqlər, Türkiyənin bu məsələyə yanaşmasında bəzi yeniliklərə yol açıb. Türkiyənin, Fələstinin Qəzza bölgəsinə dair tələbləri və İsrail ilə əlaqələrindəki potensial qarşıdurmalar, Yaxın Şərqdə yeni bir mərhələnin başlanğıcı ola bilər.
Əhməd Davudoğlu “Fələstin dövləti qurulana qədər Qəzza zolağı muxtar bölgə olaraq Türkiyəyə birləşdirilməlidir” kimi fikir səsləndirdi.
Türkiyəli siyasi ekspert Güngör Yavuzaslan Sherg.az-a açıqlamasında Türkiyə diplomatiyasının Fələstin məsələsinə dair mövqeyi, Əhməd Davudoğlunun yanaşması, yaşanan son gərginliklər və bu prosesin gələcək perspektivlərindən danışıb:
"Türkiyə diplomatiyasında belə bir başlıq yoxdur. Bunun baş verməsi üçün ilk növbədə Fələstindən tələb olmalıdır. Qəzzanı və ya HƏMAS-ı idarə etmək tələbinin qanuni və beynəlxalq əsasının olması vacibdir. Türkiyə Cümhuriyyətinin əsas dövlət siyasətində daimi atəşkəs və iki dövlətin prosesi həll etməsi nəticəsində paytaxtı Şərqi Qüds olan müstəqil və suveren Fələstin dövləti diplomatiyası var.
Türkiyənin ortaq atəşkəsi dayandırması və Fələstinin tək qalması belə bir hadisənin baş verməsinə səbəb oldu. Orada xüsusi bir bölgə yaranarsa, nəticədə İsrail və Türkiyə arasında müharibə baş verə bilər. Bu, bütün Yaxın Şərqin müharibəyə qoşulmasına və ya hətta dünya müharibəsinə çevrilə bilər".
Ekspert Əhməd Davudoğlunun açıqlmasına diqqət çəkərək Türkiyədə bunun qarşılığının olmadığını bildirib. Qeyd edib ki, proseslərin sonunda Qəzza müstəqil dövlət deyil, paytaxtı Şərqi Qüds olan bütün Fələstin, 1967-ci il Taksim Planına görə müstəqil ola bilər.
