Qərbdəki bir sıra dairələr gürcü müxalifətinin seçkidəki nəticəyə müqavimət göstərməsini və nəticələrin ləğv olunmasını istəyir
“Gürcüstanın ukraynalaşdırılması planı baş tutmayacaq. Bizim ölkədə “Maydan” ola bilməz və olmayacaq".
Bunu hakim “Gürcü arzusu” Partiyasının baş katibi, Tbilisi meri Kaxa Kaladze deyib. Onun sözlərinə görə, Gürcüstan hökuməti ölkə hüdudlarından kənarda yazılan ssenarinin agentlər tərəfindən həyata keçirilməsinə yol verməyəcək: "Dövlət institutları güclüdür və düzgün işləyirlər. Gürcüstanı heç kim məhv edə bilməz".
Qeyd edək ki, qonşu Gürcüstanda siyasi gərginlik davam edir. Hazırda Qərb təsisatları Tbilisidə son kartlarını açıq şəkildə oynayır, QHT-lərə, mediaya, institutlara, gənclər təşkilatlarına milyonlar xərcləyənlər bu gün onun qarşılığını etirazçılardan tələb edir. Tələb isə hər kəsə aydındır: Meydana çıxın və qrantların haqqını verin, Konstitusiyaya salınan 78-ci maddəyə sahib çıxın.
Nəticənin necə olacağını indidən demək çox çətindir. Görünən isə odur ki, Qərb Cənubi Qafqazdakı ən böyük qalasını itirməmək üçün hər vasitəyə əl atacaq.
Siyasi şərhçi Elvin Baxşəlizadə isə hesab edir ki, parlament seçkilərindən sonra Gürcüstanda ümumi vəziyyətin gərginləşəcəyi gözlənilirdi. Çünki müxalifətin əksər hissəsi "Gürcü arzusu"nun seçkilərdəki qələbəsini legitim hesab etmədi:
“Bunun nəticəsi olaraq seçkidən sonrakı ilk günlərdə qonşu ölkədə bir neçə böyük mitinq təşkil olundu. Amma həmin dövrdə mitinqlərdə iştirak edən insanların sayı tədricən azaldı və proses "sönməyə" doğru getdi. Hazırda baş verən etirazların isə tam orqanik olduğu şübhəlidir. Qərbdəki bir sıra dairələr gürcü müxalifətinin seçkidəki nəticəyə müqavimət göstərməsini və nəticələrin ləğv olunmasını istəyir. Əlbəttə, bu həm də Gürcüstan əhalisinin bir hissəsinin tələbidir. Amma dediyim kimi, indiki mitinqlər və iğtişaşlar tam olaraq orqanik proses deyil. Kaxa Kaladzenin açıqlamasında da əsas məqsəd Gürcüstanı xaosa sürükləmək istəyən qüvvələrə xəbərdarlıq etməkdir. Proseslərin hansı istiqamətdə gedəcəyini isə gürcü xalqının reaksiyası müəyyən edəcək. Əgər mitinqlərə qatılım sayı davamlı artarsa və tətillərin miqyası genişlənərsə, Gürcüstan hakimiyyəti geri addım atmağa, yəni istefaya məcbur olacaq. Yox, mitinq "ocaqları" tədricən sönərsə, bu, hakimiyyətin mövqelərini daha da gücləndirəcək və "Gürcü arzusu" seçkidəki qələbəsini tam legitimləşdirəcək”.
