Fransadaxili siyasi gərginlik artmaqdadır. Yay Olimpiya Oyunlarından sonra bu hal daha qabarıq müşahidə olunur. Əsas narazılıq da prezident Emmanuel Makron və komandasındandır. Prezident Fransanın ən əsas, hətta bir nömrəli probleminə çevrilib, narazılıqlar pik həddə çatıb. 80-dən çox deputatın Fransa prezidentinin hakimiyyətdən uzaqlaşdırılması ilə bağlı qətnamə imzalaması ölkədə şok effekti doğurub. Sənədin müəllifləri prezidentə qarşı impiçment prosedurunun başlanmasını təklif edirlər. Bu sənəd üzrə artıq 214 min imza toplanıb. Sənədi solçu “Yeni Xalq Cəbhəsi” blokundan olan 81 deputat imzalayıb. Bu deputatların əksəriyyəti “Ram edilməmiş Fransa” partiyasının fraksiyasındandır. Qətnamənin müəllifləri parlamentin Makrona qarşı impiçment proseduruna başlamasını istəyir. Parlamentarilər Makronun iyulun 7-də keçirilən seçkilərdə qalib gələn koalisiyadan baş nazir təyin etməkdən boyun qaçırması ilə razılaşmırlar. Qətnamə təklifini “La France insoumise” üzvü olan 72 deputatdan əlavə, “Sol Demokratlar və Respublikaçılar” qrupunun üzvləri olan Reunion adasının bir neçə ekoloqu və deputatı da imzalayıb.
Lakin Fransa Prezidenti Emmanuel Makron deyib ki, istefa vermək niyyətində deyil.
O, bildirib ki, hökumətə etimadsızlıq göstərilsə belə, səlahiyyət müddətim başa çatanadək istefa verməyəcəm.
Qeyd edək ki, Makronun səlahiyyət müddəti 2027-ci il mayın 13-də başa çatır.
Siyasi şərhçi Əziz Əlibəyli "Sherg.az"a bildirib ki, Makronun hakimiyyətdə qalmağının təmin edilməsi müxalif cəbhənin parçalanmasına görə idi:
"Millətçilər və Le Penin rəhbərlik etdiyi koalisiyanın hakimiyyətə gəlməsini istəməyən üçüncü qüvvələrin qələbəsini Pirr qələbəsi kimi görmək olar. Amma onlar qalib ola bildilər. Nəticədə isə Makronun hakimiyyəti davamlı olaraq onları təmin edir. Eyni zamanda Fransada Prezidentlik İnstitutunun xarakteri imkan verir ki, hər dəfə hakimiyyət böhranında məsuliyyət baş nazirlərə yüklənsin. Diqqətlə baxsaq, görərik ki, Makron dönəmində ən azı 4-5 baş nazir dəyişib. Bu mənada onlar yenə prosesi idarə edəcəklər. Yəni Makron 2027-ci ilə qədər necə olur olsun, hakimiyyətdə qalacaq".
