HAMAS Qəzza zolağında İsraillə atəşkəs razılaşmasının icrasını davam etdirməyə və sazişin növbəti mərhələsinə keçməyə hazır olduğunu açıqlayıb. Bu barədə HAMAS-ın yaydığı bəyanatda qeyd edilib. Bəyanatda qeyd edilib ki, atəşkəs razılaşmasının birinci mərhələsinin bağlanması ilə biz razılaşmanın bütün bəndlərinin bütün mərhələlərində və təfərrüatlarında həyata keçirilməsinə dair tam öhdəliyimizi vurğulayırıq. Biz beynəlxalq ictimaiyyətdən tələb edirik ki, heç bir gecikmə və ya yayınma olmadan razılaşmaya tam sadiq qalması və dərhal ikinci mərhələyə daxil olması üçün İsrailə təzyiq göstərsin.
Qeyd edək ki, HƏMAS və İsrail arasında Qəzza zolağında atəşkəs razılaşmasının icrasında çətinliklər yaranmışdır. Yanvarın 26-da İsrail rəsmiləri HƏMAS-ın razılaşmanı pozduğunu bildirərək, geri qaytarılması planlaşdırılan girovlardan birinin, Arbel Yehudun, azad edilmədiyini və girovların siyahısının təqdim olunmadığını qeyd etmişlər. Nəticədə, Qəzza sakinlərinin anklavın şimalına qayıtmasına icazə verilməyəcəyi açıqlanmışdır.
AĞ partiya sədrinin birinci müavini, politoloq Əhəd Məmmədli “Sherg.az”a söyləyib ki, sözügedən atəşkəs dönəmində də İsrail bir neçə dəfə atəşkəsi pozdu və müəyyən bombalamalar həyata keçirdi:
“Yəni atəşkəs rejiminə yenə İsrail tərəfi deyil, Fələstin riayət etdi. İkinci atəşkəs rejimi də təbii ki, Fələstinin maraqlarına cavab verir. Çünki atəşkəsin imzalanması qətliamın dayanmasına gətirib çıxarır. Həmas əsirlərin dəyişdirilməsi məsələsində daha çox öz adamlarını azad edə bilib. İsrail də əsirləri azad edir və nəşləri geri qaytarır. İsrail əsirləri sağollaşdıqda fələstinli əsgərlərin başından öpürdü. Amma qarşı tərəfdə elə səhnənin şahidi ola bilmədik. Halbuki İsrail sivil dövlət olaraq tanınırdı. Fikrimcə, ikinci atəşkəs razılaşmasına İsrail də əməl etməyə məcbur olacaq. Çünki İsrailin apardığı savaş onun üçün nəticəsiz qaldı. Nəticəsi olmayan müharibəni davam etdirmək isə Netanyahu iqtidarını daha da laxlada bilər”.
