“Rusiya SSRİ-nin parodiyasıdır, onun üçün eyni taleyin təkrarlanacağını istisna etmirəm”.
Teleqraf xəbər verir ki, bunu Ukrayna Prezidenti Administrasiyasının rəhbəri Andrey Yermak deyib.
Yermak bildirib ki, Rusiya müharibənin son nəticədə onu məhv edəcəyini anladıqda dayanacaq:
“Rusiyanın daha da zəiflədilməsi üçün hərtərəfli proses gedir. Sanksiyalar müharibəni bir anda dayandıra bilməz, amma Rusiya iqtisadiyyatına zərbə vurur. Kölgə donanmasına qarşı sanksiyalar da ona çox ağır zərbə vurur. Rusiyanın dərinliyinə zərbələr, “Hörümçək toru” kimi əməliyyatlar - bunların hamısı birlikdə işləyir.
Əlbəttə, Putin bu fonda “uğurları” barədə yalan danışmağa davam edir, ona illüziya yaratmaqdan başqa nə qalıb? Ruslar hələ də gücləndiyinə inanırlar. Amma bu, belə deyil, zəif vəziyyətdədirlər. Zaman da onların əleyhinə işləyir, bunun əvəzini sözün əsl mənasında canları ödəyirlər”.
Yermakın sözlərinə görə, ruslar artıq başa düşürlər ki, Rusiya böyük olsa da, Ukraynanın əlləri onun hər yerinə çatır: “Müharibə artıq onların ərazisinə yayılıb”.
Ukrayna rəsmisi qeyd edib ki, Rusiya guya xalqların könüllü birliyidir, amma heç kim ona könüllü qoşulmayıb və orada heç kəs xoşbəxt deyil:
“Rusiya Federasiyası SSRİ-nin parodiyasıdır və onun taleyini təkrarlayacağını istisna etmirəm. Beynəlxalq siyasətdə Moskva özünü çoxlarına “dost” kimi göstərir, amma bu “dostluğun” bədəlini hamı bilir. Mən əminəm ki, heç kim Rusiyanın qalib gəlməsini istəmir. Çünki hamı sərhədsiz gücə malik Rusiyanın necə olduğunu bilir”.
