Liderlər Azərbaycan-Ermənistan sülh prosesini də müzakirə edəcəklər
İran Prezidenti İbrahim Rəisi yanvar ayının ilk həftəsində Türkiyəyə səfər edəcək. Bu barədə İran xarici işlər nazirinin müavini Əli Bagiri deyib. O bildirib ki, səfər Türkiyə Prezidenti Rəcəb Tayyib Ərdoğanın dəvəti əsasında baş tutacaq. Səfər zamanı Türkiyə-İran Ali Səviyyəli Əməkdaşlıq Şurasının iclasının keçirilməsi gözlənilir. Qeyd edək ki, "Hürriyyət" nəşri səfərin 4 yanvarda baş tutacağını yazmışdı.
İran rəhbərinin Türkiyəyə gözlənilən səfərini "Sherg.az"a dəyərləndirən politoloq Azər Qasımov deyib ki, Türkiyə-İran münasibətləri ümumən normal müstəvidə görünsə də, tərəflər arasında gərginlik olub. Analitikin sözlərinə görə, gərginlik bilavasitə iki ölkənin şəxsi münasibətlərinin fonunda yaranmayıb:
"Qarşıdurmanın səbəbi regional proseslərə fərqli yanaşma ortaya qoyulmasıdır. Bir çox məsələyə ziddiyyətli aspektdən mövqe sərgiləmək ikitərəfli münasibətlərə də təsir göstərir. İran və Türkiyənin tarixi imperiya maraqları daim bu münasibətləri üstüörtülü gərginlikdə saxlayıb. Hesab edirəm ki, İran Prezidenti İbrahim Rəisinin səfəri zamanı Türkiyə Prezidenti R.T.Ərdoğanla müzakirə predmeti bu kontekstdə olacaq. İranın dəstək verdiyi regionlarda, xüsusən Yaxın Şərqdə İsrail-HƏMAS müharibəsi əsas məsələ kimi gündəmdə dayanacaq. Bununla yanaşı Azərbaycan-Ermənistan sülh prosesindəki hadisələr də müzakirə olunacaq. Görüşün nəticələrinə təsir edən amil tək regionla hüdudlanmadığı üçün ciddi nəticə gözləmək çətindir. Məsələ ondadır ki, iki tərəfin problemləri həll etməkdə gücü çatan və çatmayan məqamlar mövcuddur. Amma hər iki ölkənin Azərbaycan və Ermənistan sülh məsələsində ciddi təsir imkanlarını nəzərə alsaq, prosesə ciddi töhfələr verə bilərlər".
