Münaqişə həll edildikdən sonra Rusiya atəşkəs rejimini pozarsa, Ukrayna avtomatik olaraq NATO-ya üzv ola biləcək.
Bu barədə "Quardian" məlumat yayıb.
Nəşrin məlumatına görə, bir qrup amerikalı senator Ukraynanın NATO-ya daxil olması məsələsini Rusiya-Ukrayna sərhədindəki vəziyyətlə əlaqələndirən plan hazırlayıb.
Xatırladaq ki, bundan əvvəl Ukrayna, Rusiya ilə davam edən müharibə şəraitində NATO-ya üzvlük məsələsini gündəmə gətirib. Prezident Volodimir Zelenski, əgər Ukrayna NATO-ya qəbul edilməsə, ABŞ-dan ordu quruculuğu üçün əhəmiyyətli dəstək istədiyini bildirib. O, bu dəstəyi "Plan B" olaraq, gələcəkdə Rusiya təcavüzlərinin qarşısını almaq üçün nəzərdə tutub. Zelenski, NATO üzvlüyünün ən effektiv və sərfəli yol olduğunu vurğulayıb, lakin bəzi NATO üzvləri, o cümlədən ABŞ, hazırda Ukraynanın üzvlüyünü dəstəkləmirlər.
Cross Media Təhlil Mərkəzinin analitiki, siyasi şərhçi Mübariz Göyüşlü "Sherg.az"a söyləyib ki, bu cür məlumatları ciddi qəbul etmir:
"Ukrayna ərazi bütövlüyü problemi ilə üzləşdiyi bir vaxtda onun NATO-ya üzvlüyü alyansa əlavə yük yarada bilər. NATO-nun əsas prinsiplərindən biri odur ki, üzv dövlətlərdən birinə hücum edildikdə, bu, bütün alyansa qarşı təcavüz kimi qiymətləndirilir və kollektiv müdafiə mexanizmi işə düşür. Bu baxımdan, Ukraynanın indiki vəziyyətdə NATO-ya qoşulması qurumu birbaşa Rusiya ilə qarşıdurmaya sürükləyə bilər.
Hazırda Ukraynanın bəzi əraziləri işğal altındadır. Əgər ölkə bu şəraitdə NATO-ya üzv olarsa, alyans onun ərazi bütövlüyünün bərpası üçün hərbi müdaxilə etməyə məcbur olacaq. Bu isə münaqişənin daha da gərginləşməsinə və beynəlxalq arenada yeni qarşıdurmaların yaranmasına səbəb ola bilər. NATO və Rusiya arasında birbaşa müharibə riski yüksək olduğundan, alyans Ukraynanın üzvlüyünə ehtiyatla yanaşır və bu məsələni açıq qarşıdurma səviyyəsinə çatdırmaq istəmir".
Ekspertin fikrincə, əslində Ukraynanın NATO-ya üzvlüklə bağlı məsələni ciddiləşdirməsi müharibənin əsas səbəblərindən biri olub:
"Zelenskinin bu məsələdəki israrlı mövqeyi Rusiya üçün qırmızı xətt idi və nəticədə münaqişə qaçılmaz oldu. Bununla belə, hazırkı vəziyyətdə Ukraynanın NATO-ya üzvlüyü nə siyasi, nə də hərbi baxımdan real görünmür. Çünki ərazi bütövlüyü tam təmin olunmamış bir dövlətin alyansa qoşulması NATO-nu tarixində ən mürəkkəb hərbi-siyasi dilemma ilə üz-üzə qoya bilər.
Buna görə də, Ukraynanın NATO-ya inteqrasiyası yalnız müharibədən sonrakı dövrdə, ərazi bütövlüyü təmin edildikdən və Rusiya ilə münasibətlər müəyyən diplomatik çərçivəyə salındıqdan sonra mümkün ola bilər. Hazırda isə bu proses qeyri-realist və riskli olaraq qiymətləndirilir".
