Rusiya və ABŞ Prezidentləri Vladimir Putin və Donald Trampın mümkün görüşünə hazırlıq məqsədilə diplomatik səviyyədə ciddi iş aparılır.
Teleqraf xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova bildirib.
“Putin və Tramp arasında təmas baş tutdu və bu barədə prezident administrasiyası məlumat verdi. Prezidentin köməkçisi Yuri Uşakov da həmin söhbətin təfərrüatlarını açıqladı. Bu təmasların davamı olaraq, görüşün hazırlanması məqsədilə Rusiya və Macarıstanın xarici işlər nazirləri arasında da əlaqələr qurulub,” - deyə Zaxarova qeyd edib.
O əlavə edib ki, müxtəlif səviyyələrdə diplomatik kanallar vasitəsilə çox dərin və ciddi iş aparılır.
Xatırladaq ki, 16 oktyabrda ABŞ Prezidenti Donald Tramp Vladimir Putinlə telefon danışığından sonra yaxın vaxtlarda Budapeştdə görüşmək barədə razılığa gəldiklərini açıqlamışdı.
