Ukraynadakı Çernobıl Atom Elektrik Stansiyası ətrafında yaşayan bəzi itlərin rənginin maviyə çevrilməsi narahatlığa səbəb olub.
Sherg.az xəbər verir ki, alimləri də heyrətə salan bu dəyişimin son bir həftə ərzində baş verdiyi bildirilir.
1986-cı ildə, təxminən 40 il əvvəl baş verən Çernobıl nüvə fəlakətindən sonra bölgədə müşahidə edilən dəyişikliklər elm dünyasının diqqət mərkəzindədir.
Nüvə partlayışının ardından tərk edilmiş ev heyvanlarının nəslindən olan bu itlər, bu ay Çernobılın qadağan zonasında gəzərkən görüntüləniblər.
Mavi itlər ortaya çıxdı
Heyvanların tüklərinin maviyə dönməsi barədə məlumatı bölgədə fəaliyyət göstərən “Dogs of Chernobyl” (Çernobılın itləri) adlı xeyriyyə təşkilatı yayıb.
Qurumun açıqlamasında bildirilib:
“Hazırda sterilizasiya (nəsilartımın qarşısının alınması) işləri aparırıq və tamamilə mavi rəngdə olan üç itlə qarşılaşdıq. Nə baş verdiyini hələ tam bilmirik.”
“New York Post” qəzetinin məlumatına görə, yerli sakinlər itlərin tüklərindəki bu rəng dəyişikliyinin yalnız son bir həftə ərzində müşahidə olunduğunu bildiriblər.
“Kimyəvi maddəyə məruz qalmış ola bilərlər”
Heyvanlara baxan təşkilatın nümayəndələri, itləri yaxalayıb müayinə edəcəklərini açıqlayıblar. Qurumun bəyanatında qeyd olunub:
“Böyük ehtimalla onlar hər hansı kimyəvi maddəyə məruz qalıblar.”
Buna baxmayaraq, itlərin aktiv və sağlam göründüyü vurğulanıb.
Çernobıl ətrafında vəziyyət necədir?
2017-ci ildə yaradılmış “Dogs of Chernobyl” təşkilatı hər il qadağan zonasında yaşayan təxminən 700 iti tibbi yardım və yemək təmin edir.
Bu heyvanlar, 1986-cı ildə reaktorun partlamasından sonra bölgədən təxliyə edilən insanların geridə qoyduğu ev heyvanlarının nəsli sayılır.
Yeni suallar gündəmdə
Hadisə, Çernobıl bölgəsindəki ekoloji təsirlər və kimyəvi çirklənmə ilə bağlı yeni sualları gündəmə gətirib. Alimlər hazırda bu qeyri-adi rəng dəyişikliyinin səbəbini müəyyənləşdirmək üçün genetik və kimyəvi analizlər aparmağı planlaşdırırlar.
