Abşeron rayonu Məhəmmədi kəndində yerləşən göldə balıqların kütləvi ölümü ilə bağlı Kənd Təsərrüfatı Nazirliyinin Aqrar Xidmətlər Agentliyi (AXA), Kənd Təsərrüfatı Nazirliyinin Baytarlıq Elmi-Tədqiqat İnstitutu və Azərbaycan Respublikasının Qida Təhlükəsizliyi Agentliyi (AQTA) tərəfindən araşdırma aparılır.
Bu barədə "APA-Economics"in sorğusuna cavab olaraq Kənd Təsərrüfatı Nazirliyindən məlumat verilib.
Bildirilib ki, hər üç dövlət qurumunun mütəxəssisləri tərəfindən əraziyə baxış keçirilib, sudan və balıqlardan nümunələr götürülüb. Nümunələr AXA-nın Laboratoriya, Ekspertiza və Sertifikatlaşdırma Mərkəzi, Kənd Təsərrüfatı Nazirliyinin Baytarlıq Elmi-Tədqiqat İnstitutu və Azərbaycan Qida Təhlükəsizliyi İnstitutunun laboratoriyalarına təqdim edilib. Aparılacaq analizlərin nəticəsi əldə edildikdən sonra ictimaiyyətə ətraflı məlumat veriləcək.
Qeyd edək ki, ötən gün sosial şəbəkələrdə Məhəmmədi kəndində göldə balıqların kütləvi ölümünü əks etdirən video görüntülər yayılıb.
Ekoloq-hidroloq Rövşən Abbasov Sherg.az-a açıqlamasında bildirdi ki, kütləvi balıq ölümlərinə səbəb olan bir neçə amil mövcuddur ki, onlardan biri evtrofikasiyadır:
“Bu proses zamanı su hövzəsində oksigenin miqdarı kəskin azalır, suyun temperaturu yüksəlir və nəticədə suda həll olmuş oksigenin səviyyəsi balıqların həyat fəaliyyətini dəstəkləmək üçün yetərli olmur. Bu, cür halların baş verməsi son illər iqlim dəyişmələri ilə əlaqədar dünyanın əksər göllərində baş verir. Qlobal temperatur artımı nəticəsində suyun istiləşməsi oksigenin suda həlletmə qabiliyyətini azaldır və balıqlar üçün əlverişsiz mühit formalaşır ki, bu da kütləvi ölümlərlə nəticələnə bilir. Evtrofikasiya prosesi, əsasən, azot və fosfor tərkibli maddələrin, o cümlədən məişət və kənd təsərrüfatı tullantılarının su hövzələrinə daxil olması nəticəsində yaranır. Bu maddələr su bitkilərinin xüsusilə yosunların həddindən artıq çoxalmasına, sonradan isə onların parçalanması zamanı oksigenin tükənməsinə səbəb olur. Əksər kənd yerlərində də balıqçılar elektrik cərəyanından və ya müxtəlif kimyəvi maddələrdən istifadə etməklə balıqların hərəkətliliyini məhdudlaşdırır və onları zəhərləyirlər. Bu da yaşayan canlıların kütləvi tələfatına səbəb ola bilər. Mövcud vəziyyətin səbəblərinin tam və obyektiv şəkildə müəyyən edilməsi vacibdir”.
