389 quş növü yox olma ərəfəsindədir, səbəb iqlim dəyişikliyidir
Quşlar, elm dünyasını narahat edən bir davranış dəyişikliyi nümayiş etdirir. İqlim dəyişikliyinin təsiri ilə yaranan bu qəribə dövr minlərlə növü təhlükə altına salır.
Sherg.az xəbər verir ki, ABŞ ərazisində quşlar alimləri narahat edən bir davranış dəyişikliyi yaşayır. Artan temperatur səbəbindən bir çox növ hər il həyata keçirdikləri köç marşrutlarını tərk edir və ya köçü gecikdirir.
Cornell Universitetindən köç ekologiyası üzrə mütəxəssis Endrü Farnsvortun sözlərinə görə, bu meyl davam edərsə, çoxlu sayda quş növü məhv olma təhlükəsi ilə üzləşə bilər.
Farnsvort bildirib:
“Quşların Yer üzündəki yerləşməsi ilə iqlim arasındakı əlaqə çox güclüdür. İqlimdəki dəyişikliklər quşların həyat dövrünü birbaşa təsir altına alır.”
Qış aylarında müşahidə edilən həddindən artıq isinmə, quşların cənuba köç etmə instinktini pozur. Lakin bu gecikmə onların uyğun qida və sığınacaq tapmadan mövsüm dəyişikliyinə yaxalanmasına səbəb olur.
Xüsusilə həşəratlar və bitkilər hələ meydana çıxmadan köç bölgələrinə çatan quşlar aclıqdan və soyuqdan ölür.
National Audubon Society təşkilatının hesabatına görə, Şimali Amerikada 389 quş növü qarşıdakı 50 il ərzində məhv olmaq təhlükəsi ilə üz-üzədir.
Bu rəqəm araşdırılan növlərin təxminən üçdə ikisinə bərabərdir. Cornell Ornitologiya Laboratoriyasının məlumatına əsasən, 1970-ci ildən bəri Şimali Amerikada 3 milyard quş yox olub.
Quşlar təkcə təbiət üçün deyil, insanlıq üçün də mühüm rol oynayır: onlar zərərvericiləri məhv edir, toxumları yayır və bitkilərin tozlanmasına kömək edirlər. İnsanlar tərəfindən istifadə olunan qida və dərman bitkilərinin təxminən 5%-i quşların sayəsində tozlanır.
Quş populyasiyasının azalması banan, qəhvə, kakao kimi tropik məhsulların istehsalını azaldır, orxideya və aloe kimi dərman bitkilərinin də gələcəyini təhlükə altına salır. Bu vəziyyət həm dərman sənayesində, həm də qida istehsalında ciddi böhranlara səbəb ola bilər.
