Xəzər dənizinin səviyyəsi bütün müşahidə dövrü ərzində ən aşağı həddə enib.
Oxu.az xəbər verir ki, bu barədə Ümumrusiya Elmi-Tədqiqat Balıqçılıq və Okeanoqrafiya İstitutunun Volqa-Xəzər bölməsi məlumat yayıb.
Dəniz səviyyəsinin enməsi xüsusən ən dayaz şimal hissədə, Rusiya və Qazaxıstan akvatoriyasında özünü göstərir.
Məlumatda qeyd olunur ki, Xəzər dənizinin səviyyəsi 1990-cı illərin ortalarından başlayaraq enməyə başlayıb. 2020-ci ildən bəri Xəzərin səviyyəsi, demək olar ki, 0.8 metr azalıb.
"Azalma dənizdə əsas su mənbəyi olan Volqanın illik axınının zəifləməsi fonunda baş verib. Şirin su axınının azalması davam edir", - Okeanoqrafiya İnstitutunun məlumatında qeyd olunur.
Ekoloq Rövşən Abbasov “Sherg.az”a bildirdi ki, Xəzər dənizinin suyunun səviyyəsinin aşağı düşməsi prosesi 1995-ci ildən etibarən davam etməkdədir:
“Bu çəkilmə müxtəlif illərdə fərqli intensivliklə baş versə də, nəticədə yaranan ekoloji təsirlər sabit qalır. Suyun çəkilməsi nəticəsində Xəzər sahillərində yerləşən qiymətli fauna növlərinin, xüsusilə balıqların və Xəzər suitlərinin yaşam mühitləri ciddi şəkildə daralır. Suyun dayazlaşdığı, qurumağa məruz qaldığı ərazilərdə ekosistem strukturu və funksiyaları tam şəkildə deqradasiyaya uğramış sayılır. Bu cür ərazilərdə həyat fəaliyyətinin davam etdirilməsi qeyri-mümkünləşir. Xüsusilə yay aylarında dayazlaşmış akvatoriyalarda suyun istiləşməsi daha sürətli şəkildə baş verir ki, bu da termal şaquli stratifikasiyanın dinamikasında kəskin dəyişikliklərə səbəb olur. Nəticədə bu zonalarda oksigen çatışmazlığı yaranır. Bu isə həm artan temperatur, həm də biotik komponentlərin oksigenə olan tələbatının yüksəlməsi fonunda hidrobiontların yaşaması üçün əlverişsiz şərait yaradır”.
