Roma imperiyasından ayrılmış bir dövlətin hərbi lideri olan, lakin indiyədək uydurma obraz hesab edilən Sponsianın gerçəkdən mövcud olduğu sübut edilib.
Sherg.az xəbər verir ki, bir zamanlar “saxta” hesab edilən üçüncü əsr Roma imperatorunun varlığı qədim bir qızıl sikkənin aşkarlanması ilə təsdiqlənib.
Avropada ayrılıqçı bir Roma dövlətinin hərbi rəhbəri kimi tanınan Sponsian uzun müddət tarix kitablarından “xəyalı fiqur” kimi çıxarılmışdı. Lakin indi onun həqiqətən yaşadığı ortaya çıxıb.
“Greek Reporter” nəşrinin məlumatına görə, 300 ildən çox əvvəl onun adını və portretini daşıyan dörd qızıl sikkədən biri, Roma imperiyasının uzaq bir hərbi forpostunda tapılmışdı. O zaman mütəxəssislər bu sikkələrin XVIII əsrdə muzeydə saxlanan saxta nüsxələr olduğunu düşünmüşdülər.
Lakin son elmi analizlər mikroskop altında görünən xırda cızıqların, bu sikkənin təxminən iki min il əvvəl dövriyyədə olduğunu sübut etdiyini göstərib.
London Universitet Kollecindən (University College London) professor Pol Pirson tədqiqatı idarə edib və BBC-yə belə deyib:
“Biz bu sikkələrin orijinal olduğuna çox əminik. Tapdığımız şey bir imperatordur. Uzun illər saxta sayılıb, görməzlikdən gəlinib. Amma biz onun real şəxsiyyət olduğunu və tarixdə mühüm rol oynadığını düşünürük.”
Pirson əlavə edib:
“Sübutlar göstərir ki, Sponsian imperiyanın daxili müharibələrlə çalxalandığı, sərhədlərin isə basqınçılar tərəfindən təhdid edildiyi bir dövrdə, Roma Dakiyasındakı (indiki Rumıniya ərazisi) qızıl mədənlərində yerləşən təcrid olunmuş bir forpostu idarə edib.”
Qızıl sikkələr bu gün Rumıniyanın tərkibində olan Transilvaniya bölgəsində aşkarlanıb.
