ABŞ Prezidenti Donald Trampın İranla bağlı mümkün hərbi müdaxilə planları yalnız dar bir müşavir qrupu tərəfindən hazırlanır. İddialara görə, müdafiə naziri Pit Hegseth bu prosesdən kənarda saxlanılıb. "The Washington Post" qəzetinə danışan bir hökumət rəsmisi bildirib: “Heç kim Hegseth ilə danışmır.”
Sherg.az xəbər verir ki, İsrail-İran müharibəsinin gərginliyi artarkən, Trampın müdaxilə qərarı gözlənildiyi bir vaxtda Hegseth prezidentin müşavir heyətindən ayrılıb. Hazırda Trampa birbaşa məsləhət verən əsas heyətə vitse-prezident Cey Di Vens, dövlət katibi Marko Rubio, Mərkəzi Kəşfiyyat İdarəsinin direktoru Con Ratklif və Birləşmiş Qərargah rəisi general Den Keyn daxildir.
Pentaqondan ziddiyyətli açıqlamalar
Pentaqon Hegsethin prosesdə iştirak etdiyini bildirsə də, ABŞ hökumətindən üç mənbə onun nə əməliyyat planlamasına, nə də brifinqlərə cəlb olunduğunu deyir. Onların sözlərinə görə, əsas koordinasiya generallar Kurilla və Keyn tərəfindən aparılır, Hegseth isə tamamilə kənarda saxlanılıb.
Gizli məlumat sızması etimadı sarsıtdı
Xatırladaq ki, bu ilin əvvəlində Hegseth və Tulsi Qabbard müdafiə rəhbərliyinə gətirilmişdi. Başlanğıcda güclü rol oynasa da, sonradan Hegsethə olan etimad azalıb. Səbəblərdən biri kimi, Yəməndəki husilərə qarşı əməliyyatlarla bağlı məxfi məlumatların yanlışlıqla bir jurnalistin daxil olduğu qrupda paylaşılması göstərilir. Bu sızma beynəlxalq medianın da diqqətini çəkmişdi.
