Yeni peyk görüntüləri ABŞ-a məxsus USS Carl Vinson aviadaşıyıcısının İran yaxınlığında, Ərab dənizində yerləşdirildiyini göstərib. Gəmini iki Arleigh Burke sinifli esmines müşayiət edir.
Sherg.az xəbər verir ki, bu yerləşmə, ABŞ-ın İsrail-İran arasındakı müvəqqəti atəşkəsə baxmayaraq bölgədə mümkün toqquşmalara hazır olduğunu göstərir. CENTCOM məsuliyyət sahəsində fəaliyyət göstərən gəminin mövqeyini amerikalı analist MT Anderson peyk şəkilləri vasitəsilə aşkarlayıb.
ABŞ Hərbi Dəniz Qüvvələri və Pentaqon məlumatı təsdiqləyib. Carl Vinson, ABŞ-ın Fordo, Natanz və İsfahan kimi İranın əsas nüvə obyektlərini B-2 bombardmançıları ilə hədəf almasından 6 gün sonra bölgədə görüntülənib.
Bununla yanaşı, Pentaqon 961,6 milyard dollarlıq yeni müdafiə büdcəsi tələb edib. Bu büdcədə 19 yeni hərbi gəmi tikintisi və nüvə tersanelərinin modernizasiyası da yer alır. ABŞ-ın bu hərəkətləri bölgədə gərginliyin yenidən artması ehtimalını gündəmə gətirir.
