Beynəlxalq Cinayət Məhkəməsinin (BCM) Roma Statutu ratifikasiya üçün Ermənistan parlamentinə göndəriləcək.
APA “Sputnik Armenia”ya istinadən xəbər verir ki, bu barədə ölkənin ədliyyə naziri Qriqor Minasyan jurnalistlərə bildirib.
Minasyanın sözlərinə görə, bu, yaxın həftələrdə baş verəcək.
Qeyd edək ki, bu il martın 24-də Ermənistanın Konstitusiya Məhkəməsi Beynəlxalq Cinayət Məhkəməsinin əsasını təşkil edən Roma Statutunun konstitusiyaya uyğun olduğunu və hökumətin sazişin ratifikasiyası prosesini davam etdirməsinin mümkünlüyünü açıqlamışdı.
Ermənistan konstitusiyasının 116-cı maddəsinə əsasən, parlament beynəlxalq müqavilələri ratifikasiya edir. Bu isə o deməkdir ki, Roma Statutu ali qanunverici orqanın təsdiqi olmadan qüvvəyə minə bilməz.
Xatırladaq ki, haqqında sözügedən məsələ mübahisəli və ziddiyyətlidir. Çünki bir tərəfdən ölkə daxilində Baş nazir Nikol Paşinyana qarşı çıxan qüvvələr bildirirlər ki, Roma Statunun ratifikasiyası Rusiya ilə onsuz da gərginləşən münasibətlərin daha da pisləşməsinə gətirib çıxaracaq. Ən əsası isə sənəd Ermənistana daxil olacağı təqdirdə, Rusiya Prezidenti Vladimir Putinin həbsini nəzərdə tutur.
