“Müayinə və müalicədən yayınmaqla özləri və yaxınlarının həyatını riskə atırlar”
Samux və Quba rayonlarına “COVİD-19” virusuna yoluxmuş şəxslər yaşadıqları evi icazəsiz tərk ediblər. Bununla bağlı Daxili İşlər Nazirliyi məlumat yayıb. Noyabrın 16-da Samux rayonunun Sərkar kənd sakini koronavirusa yoluxub və yaşadığı evi tərk edib. S.İsgəndərova polis əməkdaşları tərəfindən saxlanılıb.
Eyni zamanda Xaçmaz rayon sakini Z.Kərimova da koronavirus olduğu halda yaşadığı evi tərk etdiyi üçün saxlanılıb. Müəyyən edilib ki, Z.Kərimovanın koronavirus testinin nəticəsi pozitiv çıxdığına görə ona ev şəraitində müalicə təyin olunub, yaşayış yerini tərk etməməsi, qaydalara riayət etməsi tapşırılıb. Lakin o, qaydaları pozaraq, yaşadığı ünvanı tərk etmiş və digər insanlar üçün real təhlükə yaradıb. Məlumdur ki, ölkəmizdə koronavirusa yoluxma kəskin şəkildə artmaq üzrədir.
Bütün dünyada pandemiya ilə bağlı vəziyyət getdikcə kritikləşir. Buna baxmayaraq, ölkəmizdə də məsuliyyətsizlik halları baş alıb gedir. İctimai nəqliyyatda və qapalı yerlərdə maskadan istifadə etməyən, sosial məsafəni gözləməyənlər olduqca çoxdur. Bu azmış kimi, aktiv virus daşıyıcısı olan şəxslərin öz həyatları bir yana, digərlərini təhlükəyə atması sadəcə düşüncəsizlik və laqeydlikdir.
Baş verənləri “Sherg.az”a dəyərləndirən “Sağlamlığın Qorunması” İctimai Birliyi sədri Yazgül Abdıyeva bildirib ki, vətəndaşlarımız gigiyena qaydalarına, Ümumdünya Səhiyyə Təşkilatının, Nazirlər Kabineti yanında Operativ Qərargahın tələb və tövsiyələrinə ciddi riayət etməlidirlər.
Birlik sədri qeyd edib ki, hər kəs özünütəcrid tədbirlərinə uyğun davranmalı, yalnız ciddi ehtiyac yarandıqda evdən çıxmalıdır:
“Hə kəs bilir ki, ölkəmizdə koronavirusa yoluxma pik həddə çatıb. Hər bir şəxs digərləri ilə minimum kontaktda olmalı, insanların sıx toplaşdığı yerlərə getməməli və karantin rejiminə əməl etməlidir. Bu, həm özümüzün, həm də ətrafdakıların sağlamlığı üçün çox vacibdir. Vətəndaşlar dövlətin məcburiyyəti olmadan koronavirus təhlükəsini dərk edib, evdə qalmalıdırlar”.
Y.Abdıyeva evdə qalmağın niyə vacib olduğunu açıqlayaraq bildirib ki, insanlar bəzi həqiqətləri bilməlidir:
“Qohum-əqrəba arasında çoxsaylı gediş-gəlişi və ziyarətə gedənləri nəzərə alsaq, ümumi mənzərə aydın görünər. Ölkəmizdə koronavirusa yoluxma faktının ilk və əsas səbəbi bu oldu.
Xəstəliyə yoluxanlar anlamalıdırlar ki, müayinə və müalicədən yayınmaqla həm özlərinin, həm də yaxınlarının həyatını risk altında qoymuş olurlar. Bu gün ölkəmizdə aparılan islahatlar tibb sahəsinə də sirayət edib.
Hazırkı situasiyada görülən işlər birbaşa virusun geniş vüsət almamasına hesablanıb. Əlbəttə, dünyada ürəkaçan rəqəmlər yayılmır. Kimlər ki, daha məsuliyyətli davranıb vaxtında düzgün qərar verdi, o ölkələrdə vəziyyət ağırlaşmadı.
Ona görə də hər birimiz sağlamlığımızı qorumaqla dövlətimizə yardım etməliyik”.
